Hazırkı regional siyasi proseslər fonunda Azərbaycan üçün əsas prioritet sülh sazişinin real və davamlı nəticələrə gətirib çıxmasıdır. Bakı bu məqsədlə qarşı tərəfdən konkret və prinsipial addımlar atılmasını gözləyir. Xüsusilə də, Ermənistanın konstitusiyasında yer alan və Azərbaycanın ərazi bütövlüyünə zidd olan müddəaların aradan qaldırılması sülh prosesinin irəliləməsi üçün vacib şərt kimi irəli sürülür.
Bununla belə, Ermənistan bu məsələyə fərqli yanaşır. Ermənistanın xarici işlər naziri Ararat Mirzoyan bildirib ki, ölkəsi Azərbaycan qarşısında konstitusiya dəyişiklikləri ilə bağlı heç bir öhdəlik götürməyib. Onun sözlərinə görə, konstitusiya məsələsi Vaşinqtonda keçirilən danışıqlarda müzakirə olunmayıb və Ermənistan heç bir üçüncü ölkə qarşısında bu istiqamətdə öhdəlik daşıdığını qəbul etmir.
Sabiq xarici işlər naziri, politoloq Tofiq Zülfüqarov Sherg.az-a Ermənistanın Vaşinqton görüşündən sonra qərəzli mövqe göstərməsi barəsində açıqlama verib:
"Daxili siyasi maraqlarına uyğun olaraq, onlar bu məsələni müxtəlif cür şərh edə bilərlər. Lakin Azərbaycan üçün əsas olan nəticədir. Nəticə ondan ibarətdir ki, bizim əsas şərtimiz budur: əgər Ermənistan öz konstitusiyasından Azərbaycana qarşı ərazi iddialarını ehtiva edən bəndi çıxarmasa, Azərbaycan həmin sazişə imza atmayacaq".
Onlar istəyirlər ki, bu şərtin həyata keçməsi daxili siyasi proseslər çərçivəsində baş versin və bunu Azərbaycanın tələbi kimi təqdim etsinlər".
Sabiq nazir bizim üçün bunun hansı formada reallaşmasının fərqi olmadığını söyləyib:
"Rəsmi Bakı üçün vacib olan konkret nəticədir. Həmin bənd Ermənistan konstitusiyasında qalsa, Azərbaycan sazişi imzalamayacaq".
