Şimali Kipr Türk Cümhuriyyəti olaraq Türk dünyasının ayrılmaz parçası olduğumuzu hər dəfə vurğulayırıq.
APA xəbər verir ki, bunu TÜRKPA üzv parlamentlərinin müdafiə və təhlükəsizlik üzrə komitələri sədrlərinin ikinci iclasında Şimali Kipr Türk Cümhuriyyəti Məclisinin Hüquq, siyasi məsələlər, xarici işlər və müdafiə komitəsinin sədri Yasemin Öztürk deyib.
Yasemin Öztürk bildirib ki, TÜRKPA üzvü ölkələrinin parlamentləri arasında sağlam dialoqun qurulması əsas hədəflərdən biridir: “Şimali Kipr Türk Cümhuriyyətinin beynəlxalq çərçivədə layiq olduğu yerə sahib olması lazımdır. Şimali Kipr Türk Cümhuriyyəti ilə türk dünyası arasında əməkdaşlığı gücləndirmək üçün TÜRKPA-nın oynadığı rol danılmazdır. Bu baxımdan Azərbaycanla ölkələrimiz arasında yaradılmış parlamentlərarası dostluq qrupunun əhəmiyyətini vurğulamaq istəyirəm. İstəyimiz odur ki, bütün Türk dünyası ölkələriylə parlamentlərarası əlaqələr gücləndirilsin. Bu gün burada həyata keçirəcəyimiz müzakirələrin buna təkan verəcəyinə inanıram”.
