Son illərdə beynəlxalq münasibətlər sistemində ciddi dəyişikliklər müşahidə olunur. Böyük güclər arasında yeni əməkdaşlıq formatları formalaşır, qlobal nəqliyyat-logistika marşrutları yenidən qurulur və bu, ölkələrarası strateji tərəfdaşlıqların əhəmiyyətini daha da artırıb. Bu kontekstdə Azərbaycan ilə Çin arasında münasibətlərin dərinləşməsi xüsusilə diqqətəlayiqdir. Geosiyasi mövqeyi, iqtisadi potensialı və multilateral təşəbbüslərdə fəal iştirakı Azərbaycanı Çin üçün mühüm tərəfdaşa çevirib. İki ölkə arasında formalaşan strateji əməkdaşlıq modeli təkcə ikitərəfli münasibətlərin deyil, həm də regional sabitliyin və inkişafın göstəricisi kimi qiymətləndirilir.
Politoloq Məhəmməd Əsədullazadə Sherg.az-a Azərbaycan-Çin münasibətlərindən danışıb:
"Azərbaycan ilə Çin arasında strateji tərəfdaşlıq haqqında Xartiya imzalanıb. Tərəflər siyasi, iqtisadi, nəqliyyat, enerji, humanitar, mədəniyyət və təhlükəsizlik sahələrində əməkdaşlıqda maraqlıdır. Azərbaycan Şanxay Əməkdaşlıq Təşkilatında müşahidəçi statusuna malikdir və bu təşkilat çərçivəsində də tərəflər arasında qarşılıqlı fəaliyyət genişlənməkdədir.
Çin Xalq Respublikası Azərbaycanla münasibətlərə böyük önəm verir. Hətta hərbi-texniki əməkdaşlıq sahəsində də müvafiq sənədlər imzalanıb. İki ölkə arasında münasibətlər yüksək səviyyədədir və qarşılıqlı etimada əsaslanır.
Prezident İlham Əliyevin Çinə son səfəri zamanı ikitərəfli münasibətlərin bütün əsas sahələrini əhatə edən vacib razılaşmalar əldə olunub. Səfər çərçivəsində müxtəlif sahələr üzrə müqavilələr imzalanıb, qarşılıqlı viza rejimi ləğv edilib. Bu, tərəflərin münasibətlərin dərinləşdirilməsinə verdiyi əhəmiyyətin göstəricisidir".
Politoloq Çindən Avropaya daşınan yüklərin Azərbaycandan keçməsinin ölkəmizin “Bir Kəmər, Bir Yol” təşəbbüsündə və tarixi İpək Yolunun bərpasında strateji mövqeyə malik olduğunu təsdiqlədiyini söyləyib:
"Azərbaycan bu layihədə prioritet tərəfdaş ölkə kimi çıxış edir. Çin Xəzər regionunda Azərbaycanla bütün sahələrdə əməkdaşlıqda maraqlıdır və bu maraq qarşılıqlıdır. Çin hazırda dünyanın yeni siyasi-iqtisadi qütblərindən biri kimi formalaşır və güclü siyasi, iqtisadi və hərbi potensiala malikdir. Azərbaycan da Çinlə əməkdaşlığı milli maraqlarına uyğun hesab edir və bu əlaqələrin gələcəkdə daha da inkişaf edəcəyinə əmindir".
