Ancaq istənilən halda tərəflərin hansı addım atacağı yaxın günlərdə aydınlaşacaq
Ermənistanda Rusiyanın “Birinci kanalı”nın yayımı bir müddətliyinə dayandırılıb. Ermənistan Yüksək Texnologiyalar Nazirliyinin məlumatına görə, ölkənin daxili siyasətinə hörmətsiz münasibət istənilən kanalların fəaliyyətinin dayandırılmasına səbəb olacaq. Qadağadan bir neçə gün keçəndən sonra kanalın fəaliyyəti bərpa olunsa da, İrəvanın bu hərəkəti Moskvanı əməlli-başlı qəzəbləndirib. Rusiyalı ekspertlər Paşinyan hökumətinin bütün xətləri keçdiyini iddia ediblər. Bununla yanaşı, İrəvan Moskvanın yardım təkliflərini də cavabsız qoyub. Ermənistanda yağan leysan yağışları nəticəsində xüsusilə Lori və Tavuş vilayətlərində ciddi fəsadlar zamanı Rusiya Müdafiə Nazirliyi rəsmi açıqlama yayaraq, dərhal yardım təklif etmişdi. Ermənistandakı 102-ci hərbi bazaya lazımi texnika və canlı qüvvə ilə hazır olmaq tapşırıldığı və İrəvanın təklifi qəbul edəcəyi halda dərhal yardım üçün fəaliyyətə başlayacaqları bildirilmişdi. Lakin Ermənistan, ümumiyyətlə, Rusiya MN-in yardım təklifinə cavab verməyi belə lazım bilməyib. Xatırladaq ki, bir neçə gün əvvəl Rusiya Ermənistandakı səfirini məsləhətləşmələr adı ilə geri çağırmışdı. Əksər şərhçilər bu addımı İrəvan-Moskva gərginliyinin daha da artması kimi dəyərləndirmişdi.
Beynəlxalq Münasibətlər və Diplomatiya Araşdırmaları Mərkəzinin rəhbəri Samir Hümbətov "Sherg.az"a deyib ki, Rusiya uzun müddətdir Ermənistanda hakimiyyət dəyişikliyi etməyi qarşısına məqsəd qoyub və bu da iki ölkənin münasibətlərini kəskinləşdirib. Ekspertin sözlərinə görə, qarşılıqlı şəkildə aparılan söz dueli də gərginliyin göstəricisidir:
"Paşinyan yaxşı başa düşür ki, ilk fürsətdə Rusiya onu hakimiyyətdən devirəcək. Rusiyalı deputat M.Zatulin son çıxışında bu məsələyə toxundu və vurğuladı ki, Paşinyanın hakimiyyətdə qalması Moskva üçün təhdiddir. Bu da o deməkdir ki, Kreml Paşinyanın hakimiyyətdə qalmasını qətiyyən istəmir. Bunun fərqində olan Paşinyan anti-Rusiya yönümlü addımlarını atmaqda davam edir. Rusiyaya məxsus hərbi kontingenti Ermənistan ərazisindən çıxarmağı planlaşdırır. Rusiya-Ermənistan münasibətlərinin gərginləşməsi Cənubi Qafqazdakı proseslərə də təsirsiz ötüşə bilməz. Gərginlik getdikcə artacaq və bundan nə Ermənistan, nə də Rusiya qazanclı çıxacaq. İstisna edilmir ki, müəyyən müddətdən sonra tərəflər arasında gərginlik səngisin və konsensus əldə edilsin. Bütün əngəllərə baxmayaraq, Paşinyan hakimiyyətini qoruyub saxlayarsa, Moskva Paşinyan administrasiyası ilə yaxınlaşmağa çalışacaq. Çünki Rusiya Ermənistanı itirmək istəmir. Ancaq istənilən halda tərəflərin hansı addım atacağı yaxın günlərdə aydınlaşacaq".
