Millət vəkili Vüqar Bayramov uşaqların sayına görə anaların daha tez pensiyaya çıxmasını təklif edib
"Çoxuşaqlı ailələrlə bağlı məsələ tez-tez müzakirə mövzusu olur". Bunu Milli Məclisin Əmək və sosial siyasət komitəsinin dünən keçirilən iclasında komitə sədri Musa Quliyev deyib. Komitə sədri bildirib ki, çoxuşaqlı ailə anlayışına baxılmalıdır: “Biz bütövlükdə demoqrafik inkişaf haqqında dövlət proqramının qəbulu ilə bağlı düşünməli və hökumətə təkliflərimizi verməliyik. Təbii artım aşağı düşüb. Bundan əvvəl ilə 150-160 min uşaq doğulurdusa, indi onların sayı 100-110 minə enib. Buna görə də çoxuşaqlı ailələrlə bağlı 5 və daha çox uşaq məsələsinə yenidən baxmaq, yəni çoxuşaqlı ailə anlayışında sayı aşağı salmaq barədə düşünmək olar”.
Millət vəkili Vüqar Bayramov uşaqların sayına görə anaların daha tez pensiyaya çıxmasını təklif edib. Deputat vurğulayıb ki, 5 uşaqlı ailələrlə 7 uşağı olan valideyn eyni güzəştə sahibdir:
"Təklif edirəm ki, uşaqların sayına görə analar daha tez pensiyaya çıxsın. Uşaqların sayına uyğun olaraq pensiya yaşı müəyyən ola bilər. Bu da təbii artıma kömək edəcək".
Vüqar Bayramov əlavə edib ki, güzəştli şərtlərlə pensiya yaşı müəyyənləşdirilən zaman kəmiyyət indikatorları ilə yanaşı, keyfiyyət meyarlarından da istifadə edilməsi məqsədəuyğun olardı:
"Bu gün müzakirə etdiyimiz “Əmək pensiyaları haqqında" Qanuna əsasən, valideynlərini itirmiş və ya valideyn himayəsindən məhrum olmuş səkkiz yaşınadək övladlığa və ya qəyyumluğa götürülmüş uşaqlar da daxil olmaqla beş və daha çox uşağı olanlar 5 il daha tez pensiyaya çıxırlar. Müzakirə etdiyimiz dəyişikliklər ilə onların pensiya təminatı dövlət büdcəsi hesabına həyata keçiriləcək. Bununla belə, 5 uşağı olan ilə 5-dən daha çox uşağı olanların pensiya güzəşti eynidir. Halbuki, uşaqların sayına görə pensiya yaşının azaldılması daha məqsədəuyğun olardı. Bu halda daha çox azaldılması daha məqsədəuyğun olardı. Daha çox övladı olan valideynlər daha tez pensiyaya çıxa bilərlər. Bu kontekstdən pensiya yaşının müəyyənləşdirilməsində keyfiyyət meyarlarından istifadə sosial təminat baxımdan da arzuolunandır".
