"Məktəbli avtobusu" layihəsinin qarşıdan gələn tədris ilində həyata keçirilməsi planlaşdırılır.
Bunu elm və təhsil naziri Emin Əmrullayev jurnalistlərə açıqlamasında deyib.
Təhsil eksperti Cahid İmanlı "Sherg.az"a bildirib ki, "Məktəbli avtobusu" layihəsi ABŞ, Avstrya, Almaniya, İngiltərə, Fransa, Yaponiya, Türkiyə və bir çox digər ölkələrdə uğurla tətbiq edilir:
“Məktəb avtobuslarının həm şəhərlərdə, həm də qəsəbə və kəndlərdə tətbiq edilməsi təcrübəsi mövcuddur. Layihə öz-özlüyündə müsbət qiymətləndirilməlidir, amma onun səmərəli olub-olmaması üçün bir-çox analitik araşdırmalar aparmaq lazımdır. Məktəbli avtobuslarının konkret hansısa məktəbə təhkim edilməsi, yaxud da müəyyən marşurutlar üzrə hərəkət sxemləri məsələsi də öz effektiv həllini tapmalıdır. Layihənin ən müsbət tərəfi şagird təhlükəsizliyinin təmin edilməsidir. Məlumdur ki, hazırda ictimai nəqliyyatlarda pik saatlarda həddən artıq sıxlıq olur. Bu da uşaqların marşurutlara minməyində çətinlik yaradır. Hətta uşaqlar bullinqə məruz qala bilir. Bunun üçün də bəzən valideyinlər məcbur olub ya özləri də uşaqlarla birgə ictimai nəqliyyatda məktəbə gəlirlər, ya da şəxsi nəqliyyat vasitələri ilə uşaqlarını məktəbə gətirməyə üstünlük verirlər. Nıticədə nəqliyyat yollarının əlavə yüklənməsi və tıxaclar baş verir. Digər tərəfdən layihənin uğurlu alınmasını şübhə altına qoyan məsələlər də mövcuddur. Burada ən aktual məsələlərdən biri də nəqliyyatda gecikmələrin olmasıdır. Heç kimə sirr deyil ki, Bakıda avtobusların müəyyən olunmuş vaxt qrafikində işləməsi çətindir. Belə olduqda şagirdlərin də dərsə gecikmələrinin baş verməsindən qaçmaq olmayacaq”.
