Bakıda yeniyetmə oğlan anası ilə dalaşandan sonra itkin düşüb.
Oxu.Az-ın xəbərinə görə, hadisə mayın 5-də baş verib.
Paytaxtın Nizami rayonu, Babək prospekti. 67, mənzil 5-də yaşayan Əhmədova Şamba Şaməddin qızı Nizami RPİ-nin 24-cü PŞ-yə ərizə ilə müraciət edərək bildirib ki, övladı, 2009-cu il təvəllüdlü Əhmədov Marif Nicat oğlu onunla ailə-məişət zəminində mübahisə edərək yaşadıqları ünvandan çıxıb və bir daha geri qayıtmayıb.
İtkin düşən şəxs Əhmədov Marif Nicat oğlunun olduğu yerin müəyyən edilməsi ilə bağlı zəruri əməliyyat-axtarış tədbirləri davam etdirilir.
Psixoloq Sevinc Baxışova Sherg.az-a bildirib ki, valideynlərin uşaqlarla yeniyetmələri düzgün ayırd edə bilməməsi bəzi ciddi problemlərin baş verməsinin əsas səbəbidir:
“Əksər hallarda valideynlər nəyə icazə vermək və ya nəyə qadağa qoymaq lazım olduğunu bilmirlər. Bütün bunların hamısı valideynlərlə yeniyetmələr arasındakı qarşılıqlı münasibətdə bir sıra problemlərin yaranmasına səbəb olur. Valideyn-yeniyetmə arasındakı qarşılıqlı münasibətlər nə qədər əlverişli olarsa, onların şəxsiyyətinin formalaşması da bir o qədər düzgün istiqamətdə gedər. Yeniyetməlik dövrü problemli bir dönəm demək deyil. Valideyn başlanğıcda uşağa nə verirsə yetkinlik dövründə də onu alır. Bu dövrdə bütün gizli işlər üzə çıxır, böhran və konfliktlər nəzərə çarpır. Yeniyetmələr və valideynlər arasında qarşıdurma belə başlayır. Yeniyetmələr kobud, sərt olur, valideynlərini və başqa şəxsləri tənqid edir. Əvvəl valideynlər uşaqlarla qarşılıqlı münasibətlərdə çox şeyləri hiss etmirdilər, öz avtoritetlərinin yüksək olmasına inanırdılar bu dövrlərdə fizioloji dəyişikliklər və psixoloji dəyişikliklərin bir-biri ilə bağlılığını yadda saxlamaq lazımdır. Həyat insana ona görə verilib ki, ömrünün son dəqiqələrinə kimi onu qorusun. Ürəyimizi sevgi ilə doldursaq, bir birimizə qarşı diqqətli və anlayışlı olsaq, yaxın və doğmalarımızın səhv qərarlarına mane olub həyatlarını xilas edə bilərik”.
