Türkiyə Səhiyyə naziri Kemal Memişoğlu bildirib ki, yaşlı insanların həyat keyfiyyətini artırmaq və onların
sağlam qocalmasını dəstəkləmək məqsədilə “Sağlam Qocalma” proqramı başlatılır.
Sherg.az xəbər verir ki, Memişoğlu, Türkiyə cəmiyyətində yaşlılara verilən dəyərin çox yüksək olduğunu vurğulayaraq, belə bir proqramla yaşlılara sağlam həyat vərdişləri qazandırmaq, sağlamlıqlarını qorumaq və sağlam qocalma yollarını öyrətmək istədiklərini deyib.
80 yaşdan yuxarı şəxslər və yatağa bağlı xəstələr üçün uzun müddətdir tətbiq olunan evdə səhiyyə xidmətlərinin gücləndirilərək davam etdirildiyini qeyd edən Memişoğlu deyib:
“Evdən çətin çıxan və ya xəstəxanaya getməsi riskli olan vətəndaşlarımızı yormuruq. Dərman və səhiyyə sənədlərini onların evlərinə çatdırırıq.”
Elektron sistemlə daha yaxından nəzarət
Memişoğlu əlavə edib ki, elektron sistem vasitəsilə xəstələrin müayinəsi daha təsirli həyata keçirilir:
“Dərman və digər sənədlərlə bağlı elektron sistem bizə bu işdə çox kömək edir. Rapor bitməmiş yenisini hazırlayıb veririk. Beləliklə, yaşlılarımız xəstəxanalarda növbə gözləmək məcburiyyətində qalmır. Çünki müəyyən yaşdan sonra xüsusilə də yatağa möhtac olmusansa, həyat çox çətinləşir. Bu, onların yaxınları üçün də keçərlidir. Biz yalnız yaşlılara və yatağa bağlı xəstələrə deyil, həm də onlara baxan insanlara kömək edirik. Çünki nəticədə onların gündəlik yükünü azaltmaq üçün yerində səhiyyə xidməti təqdim edirik.”
