Samir Hümbətov: Yəhya Rəhim Səfəvinin fikirləri böyük ehtimalla yeni qarşıdurmanın olacağını göstərir
Elman Vəliyev: İran üçün fərqli bir senari yazılıb, hətta etnik olaraq parçalanma daha məqbul görünür
“İranla İsrail arasında müharibə yenidən başlaya bilər, amma bundan sonra daha müharibə olmayacaq”.
Bunu İranın Ali rəhbəri Əli Xameneinin baş müşaviri Yəhya Rəhim Səfəvi deyib.
Rəhim Səfəvi ölkəsi ilə İsrail arasında 12 günlük müharibədən sonra indiki vəziyyətlə bağlı qeyd edib:
“Hazırda atəşkəs şəraitində yox, müharibə mərhələsindəyik. Bizimlə ABŞ və İsrail arasında heç bir yazılı protokol, saziş və razılaşma yoxdur. Ordu üçün ssenarilər tərtib edirik, ən pisini görür və bu plana uyğun olaraq hazırlaşırıq”.
Politoloq-konfliktoloq Elman Vəliyev Sherg.az-a deyib ki, bunu müharibə kimi qiymətləndirmir:
"Bu, İsrailin strateji planlamasıdır. İran 79-cu ildən bəri onlara xidmət etmir?! Böyük İsrail dövləti üçün hər şey mübahdır deyib fəaliyyət göstərirlər. İran üçün fərqli bir senari yazılıb. Etnik olaraq parçalanma daha məqbul görünür. Amma hazırda qarşıdurma gözləmək olmaz. Çünki Trampı sülh adamı kimi qələmə verirlər. Belə etməklə Amerikanı beynəlxalq siyasətdə sülhü bərqərar edə biləcək əsas aktor kimi göstərməyə çalışırlar. “Feyk” savaşlar yaradıb sonra Amerika ora “sülh” gətirir. Mənə görə optimal ehtimallar bunlardır".
Politoloq Samir Hümbətovun fikrincə, müharibənin baş vermə ehtimalı hər zaman var:
"Anlaşma yoxdursa, münaqişə qaçılmazdır. Xüsusilə İran və İsrail kimi həssas ölkələr üçün bu, daha böyük ehtimaldır. Əgər müharibəyə hazırlıq gedirsə, orada müəyyən kəşfiyyat məlumatları var. Odur ki, yeni münaqişə və ya mövcud müharibənin davamı gözlənilir.
Əvvəlki müharibə dönəmində də qeyd etmişdik ki, tərəflər arasında qarşıdurmalar baş verə bilər. Bu, senarinin birinci mərhələsi idi, ikinci mərhələ isə qabaqdadır. Ola bilər ki, müəyyən güc toplamaq üçün birinci müharibənin gedişatı dayandırılsın. Amma ikinci müharibəni dayandırmaq riski yüksəkdir. Yəhya Rəhim Səfəvinin fikirləri böyük ehtimalla yeni qarşıdurmanın olacağını göstərir".
