1996- cı ilin noyabrın 1 - də, dünyagörüşü ilə seçilən bir qrup gənç "7 Gün" qəzetindən ayrılaraq "Şərq"in əsasını qoydu. Həmin dövrdə ölkədə "qəzet bumu" yaşanır, hər gün, hər həftə yeni qəzet satışa çıxarılırdı.
"Şərq" isə ilk sayından dizaynı, maraqlı yazıları, özəl xəbərləri ilə seçildi. 1000 tirajla nəşrə başlayan qəzetin 3 ay sonra tirajı 6 mini üstələdi. Bununla da "Şərq" qəzeti günaşırı nəşrə başladı. 90 faizdən çox satış göstəricisi "Şərq"i rəqabət mühitində önə çıxardı. "Nə iqtidar, nə müxalifət! Yalnız həqiqət " prinsipini qorumağa çalışan "Şərq" qısa zamanda müstəqil qəzetçilik xəttinin parlaq obrazına çevrilməyi bacardı.
2001 - ci ilin aprelində "Şərq" gündəlik çap olunmağa başladı. Çətinliklə nəşrini qoruyub saxlayan qəzetin nüfuzu, ictimai rəyə təsir imkanları getdikcə artdı. "Şərq" heç vaxt siyasi oyunçuya, partiyalı qəzetə çevrilmədi.
"Şərq" in ən böyük üstünlüyü və gücü jurnalistlərə müstəqil yaradıcılıq mühiti yaratmasında, gənclərə qapı açmasında və yeni imzaları çəkinmədən tanıtmasındadır.
28 il müddətində qəzetdə 200 - ə yaxın jurnalist çalışıb, əksəri ilk qələm təcrübəsini burda öyrənib.
Bu gün müxtəlif media strukturlarında, dövlət qrumlarında, ictimai sektorda onlarla "Şərq"çi çalışır. Bu həmkarlarımızın hamısı bu gün şərəflə "Şərq"çi adını daşıyır.
Günəş Şərqdən doğur. Günəşə doğru!
Bayramımız mübarək!
