Yeni yayımlanan CIA sənədləri, Lee Harvi Osvaldın Kennediyə edilən sui-qəsddən aylar əvvəl agentliyin nəzarətində olduğunu ortaya çıxarıb. Bu ehtimal illərdir irəli sürülən “CIA-nin Osvald haqqında məlumatı yox idi” iddiasını təkzib edir.
Sherg.az xəbər verir ki, ABŞ-nin kəşfiyyat qurumu olan CIA, ABŞ Prezidenti Con F. Kennediyə sui-qəsd törədən Li Harvi Osvaldın 1963-cü ildəki sui-qəsddən aylar əvvəl artıq agentliyin diqqət mərkəzində olduğunu göstərən yeni sənədlər yayımlayıb.
Bu, Kennedi sui-qəsdindən indiyə qədər ilk dəfə təsdiqlənən və CIA-nin illərlə davam etdirdiyi “Osvald haqqında kifayət qədər məlumatımız yox idi” iddiasını təkzib edən mühüm bir hadisədir.
Sənədlər ABŞ Nümayəndələr Palatasının Nəzarət Komitəsinə bağlı “Federal Sirlər üzrə İşçi Qrupu”nun bu ayın əvvəlində üzə çıxardığı 40 sənəddən ibarət paketdə yer alır. Açıqlama, CIA-nin uzun illərdir müdafiə etdiyi rəsmi rəvayəti sarsıdaraq, daha geniş miqyaslı ört-basdır ehtimalını yenidən gündəmə gətirib.
Sənədlərdə qeyd olunur ki, CIA əməkdaşı Corc Joannides Kennedinin öldürülməsindən aylar əvvəl ABŞ-də Fidel Kastroya qarşı fəaliyyət göstərən antikommunist Kuba tələbə qruplarına sızma səylərinə rəhbərlik edib.
Joannides, Kastroya qarşı təbliğat yaymaq və Kastro tərəfdarlarını zəiflətmək məqsədilə gizli əməliyyatlar aparıb. Bu əməliyyat çərçivəsində “DRE” adı ilə tanınan Kuba tələbə qrupunun maliyyələşdirilməsi və yönləndirilməsi də həyata keçirilib.
Həmin qrupun üzvlərinin Kennedi sui-qəsdindən üç ay əvvəl ABŞ-nin Kastroya yaxın siyasətini açıq şəkildə müdafiə edən Osvaldla mübahisə etdikləri qeyd olunub.
Yeni yayımlanan JFK sənədlərini araşdıran Nümayəndələr Palatası komitəsinin rəhbəri Anna Paulina Luna “Vaşinqton Post” qəzetinə göndərdiyi e-poçtda bildirib: “Bu sənədlər cəmiyyətin uzun illərdir şübhələndiyini təsdiqləyir: CIA Amerika xalqına yalan danışıb və ortada bir ört-basdır var idi”.
Yeni sənədlər Kennedi sui-qəsdi ilə bağlı birbaşa yeni məlumat vermir və Osvaldın təkbaşına hərəkət edib-etmədiyini də aydınlaşdırmır.
Mart ayında Tramp administrasiyası Kennedi sui-qəsdinə dair minlərlə gizli sənədi yayımlamışdı. Tramp prezidentliyinin üçüncü günündə “Con F. Kennediyə qarşı sui-qəsdə dair bütün sənədlər tam və əhatəli şəkildə açıqlansın” əmrini vermişdi. Tədqiqatçılar təxminən 3 min 500 sənədin ilk dəfə ictimaiyyətə təqdim ediləcəyini gözləyirdi.
Buna baxmayaraq, mütəxəssislər bu addımı ümidverici bir başlanğıc kimi dəyərləndirsələr də, sənədlərin üçdə ikisinin və son vaxtlar aşkarlanan FBI sənədlərinin hələ də yayımlanmadığını bildiriblər.
