“Nəzərə alsaq ki, payız mövsümündə virus və bakterioloji, yuxarı tənəffüs yolları xəstəlikləri koronavirusla bağlı durumu daha da çətinləşdirə bilər”
“Vaksinasiya “Delta” ştammından qorumur, yalnız xəstəliyi yüngül keçirməyə şərait yaradır”
“Məktəb və universitetlər açılacağı təqdirdə kütləvi yoluxma halları baş verərsə, bütün bunlar çox ciddi müzakirə ediləsi məsələdir”
Ölkəmizin təhsil cameəsi orta və ali məktəblərdə təhsilin bərpasını müzakirə edir. Son günlər isə Azərbaycanda koronavirusa yoluxma və ölüm sayında kəskin artımlar müşahidə edilir. “Delta” ştammı sürətlə yayılır, azyaşlı uşaqlar belə virusa yoluxurlar.
Qeyd edək ki, qarşıdakı aylarda payız mövsümü gəlir. Bu fəsildə isə koronavirus və digər viruslar daha da aktiv fazaya keçir, daha sürətlə yayılır və virusların öldürücülük qabiliyyəti daha da artır. Maraqlıdır, belə olan halda Azərbaycanda ənənəvi təhsilin bərpası məqsədəuyğundurmu?
Milli Məclisin Əmək və sosial siyasət komitəsinin sədri, millət vəkili Musa Quliyev “Sherg.az”a açıqlamasında bildirib ki, ölkəmizdə təhsilin ənənəvi formada bərpasına dair vəziyyəti Operativ Qərargah qiymətləndirəcək:
“Lakin düşünürəm ki, yanvar ayına qədər orta məktəblərdə, hətta universitetlərdə təhsili bərpa etməyə tələsməyək. Mövcud situasiyanı izləməliyik. Artıq şagird və tələbələrimiz bir il yarımdır ki, onlayn formada təhsil alırlar. Hesab edirəm ki, bu da çox düzgün bir qərardır. Belə olduqda yoluxma sayı xeyli dərəcədə aşağı düşmüşdü. Nəzərə alsaq ki, geniş yayılan “Delta” ştammına uşaqlar və yeniyetmələr də sürətlə yoluxurlar. Uşaqlar arasında isə vaksinasiya tətbiq olunmur, çünki peyvənd 18 yaşdan yuxarı şəxslərə vurulur. Ancaq vaksinasiya “Delta” ştammından qorumur, yalnız xəstəliyi yüngül keçirməyə şərait yaradır. Məktəb və universitetlər açılacağı təqdirdə kütləvi yoluxma halları baş verərsə, bütün bunlar çox ciddi müzakirə ediləsi məsələdir. Ona görə də yanvara qədər tələsməməyin tərəfdarıyam, o zamana qədər onlayn təhsil davam etməlidir. Yanvardan sonrakı vəziyyəti dəyərləndirib, yeni qərar vermək olar. Bəlkə, “Delta” ştammı bir-iki aya bitəcək. Ölkəmizdə vaksinasiya faiz də yüksək deyil. Hər iki dozanı vurduranlar heç 30 faiz olmayıb. Nəzərə alsaq ki, payız mövsümündə virus və bakterioloji, yuxarı tənəffüs yolları xəstəlikləri koronavirusla bağlı durumu daha da çətinləşdirə bilər. Dərslər əyani olaraq başlayanda tələbələrdən kimsə yoluxarkən dərslərə ara verməlidir. Bu da həmin tələbələrin davamiyyətinə və verəcəkləri imtahana təsir edəcək. Ona görə də bütün məqamlar ölçülüb-biçilməlidir”.
Millət vəkilinin sözlərinə görə, ölkəmizdə pandemiya yeni başalayan zaman cənab Prezident bütün dünyaya bəyan etdi ki, mənim üçün insanların sağlamlığı hər şeydən önəmlidir:
“Ölkə başçısının irəli sürdüyü bu şüarı əlimizdə bayraq edərək insan sağlamlığını ön plana çəkməliyik”.
