ABŞ-nin texnologiya nəhəngi Apple şirkəti yeni nəsil M6 prosessoru ilə təchiz edilmiş 14 düymlük MacBook Pro noutbukunu təqdim edib.
Musavat.com xəbər verir ki, şirkətin oktyabrın 27-də yaydığı açıqlamaya əsasən, yeni kompüter bir dəfə enerji doldurulmaqla 24 saata qədər işləyə bilir. Bu, Apple kompüterləri arasında ən yüksək batareya göstəricilərindən biridir.
Yeni noutbukun diqqətçəkən xüsusiyyətlərindən biri sürətli enerji doldurma texnologiyasıdır. Belə ki, uyğun adapter vasitəsilə cihazın batareyasını cəmi 30 dəqiqəyə 50 faizə qədər doldurmaq mümkündür.
Apple-ın məlumatına görə, yeni M6 prosessoru əvvəlki M5 modeli ilə müqayisədə süni intellektlə bağlı əməliyyatları 25 faiz, qrafik tapşırıqları isə 30 faizədək daha sürətli yerinə yetirir.
Yeni kompüterin digər texniki üstünlükləri də açıqlanıb.
M6 prosessoru 12 nüvəli mərkəzi və 12 nüvəli qrafik emal sistemi ilə təchiz olunub. Kompüterdə 16 GB operativ yaddaş standart olaraq təqdim edilir, yaddaşı 32 GB-a qədər artırmaq mümkündür.
Bundan başqa, yeni MacBook Pro Wi-Fi 7 və Bluetooth 6 texnologiyalarını dəstəkləyir. Cihaz 12 meqapiksellik kamera, altı dinamikli səs sistemi və yüksək keyfiyyətli Liquid Retina XDR ekranla təchiz edilib.
Şirkət bildirib ki, yeni prosessor xüsusilə süni intellekt proqramlarının işlədilməsi, videoların montajı, qrafik dizayn və mürəkkəb proqramlaşdırma əməliyyatlarında ciddi performans artımı təmin edir.
Yeni noutbukun qiyməti də məlum olub.
ABŞ bazarında cihazın başlanğıc qiyməti 1999 dollar müəyyən edilib. Kompüter qara və gümüşü rənglərdə satışa çıxarılacaq.
Oktyabrın 28-dən etibarən 35 ölkə və regionda ilkin sifarişlər qəbul ediləcək. Noyabrın 6-dan isə yeni noutbukun rəsmi satışına başlanılacaq.
Qeyd edək ki, Apple eyni gündə M6 prosessoru ilə təchiz edilmiş yeni iMac kompüterini də təqdim edib. Şirkətin açıqlamasına görə, həmin cihaz əvvəlki M4 modeli ilə müqayisədə süni intellekt əməliyyatlarını beş dəfəyədək sürətli yerinə yetirə bilir.
