AĞ Partiya Zəngəzur Komissiyası "Göyçə-Zəngəzur Respublikası" ilə əlaqədar bəyanat yaydı.
"Sherg.az" xəbər verir ki, bəyanatda deyilir: "Bir neçə müddətdir ortaya atılan, kimə və nəyə xidmət etdiyi məlum olmayan Göyçə-Zəngəzur Respublikası" adlı qondarma qurumun hazırkı dönəmdə fəallaşması Azərbaycan Respublikasının maraq perspektivləri ilə üst-üstə düşmür. Xüsusilə son dərəcə həssas dönəmdə Azərbaycan Respublikası xaricində kiminsə "Zəngəzur" adına iddia etməsini yalnız avantüra adlandırmaq yanlışdır. Bu eyni zamanda mənfur niyyətdən də xəbər verir. Ola bilsin ki, bu şəxslər "Zəngəzur" kimi tarixi Azərbaycan torpaqlarını öz al-ver predmetlərinə çevirmək istəyirlər. Bu halın özü də iki qat ziyanlıdır. Azərbaycan 100 il sonra ilk dəfə öz tarixi haqqı olan torpaqlarını qaytarmağa bu qədər yaxın olduğu bir vaxtda belə absurd iddiaları ortaya atmağı heç bir şəkildə xoş niyyətlə qəbul etmək məqbul deyil. Biz eyni zamanda onu da yaxşı bilirik ki, bu ayaq tutub yeriməyəcək natamam cəhdlərin gələcəkləri yoxdur. Ölkəsini, vətənini, millətini, suverenliyini prioritet hesab edən heç bir Azərbaycan vətəndaşı bu "projeyə" dəstək verməyəcək. Bizim bəyanat yaymaqda məqsədimiz yalnız "Göyçə-Zəngəzur Respublikası" adlı qurumla əlaqədar deyil. Biz bu bəyanatı həm də ona görə ictimaiyyətə yayırıq ki, hər kəs bilsin və agah olsun ki, bizim bir tək vətənimiz var. Onun da adı Azərbaycan Respublikasıdır. Bütöv Azərbaycan xaricində heç bir qurumu qəbul etmirik. Sərhədlərimiz daxilində hər hansı torpaq parçasına iddia edənlər separatçılıqla məşğul olmuş hesab edəcəyik. Yaşasın bütöv Azərbaycan. Zəngəzur Azərbaycandır.
Hörmətlə AĞ Partiya Zəngəzur Komissiyası
