Vətəndaş cəmiyyəti belə bir çox mühüm aksiya həyata keçirir. Çünki burada olan hər kəs Azərbaycanın təbii sərvətlərinin qanunsuz talanmasına etiraz edir. “Qızılbulaq” qızıl və “Dəmirli” mis-molibden yataqlarında ermənilər tərəfindən qanunsuz istismar həyata keçirilir. Oradan əldə olunan gəlirlər isə ayrı-ayrı şəxslərin hesabına köçürülür. Bununla yanaşı, ətraf mühitə çox ciddi ziyan dəyib. Bizim burada olmağımızın səbəbləri də ərizilərimizdə həyata keçirilən qanunsuz istismarın qarşısını almağa yönəlib.
Bu fikirləri AZƏRTAC-a müsahibəsində “Konstitusiya” Araşdırmalar Fondunun prezidenti Əliməmməd Nuriyev söyləyib.
Ə.Nuriyev qeyd edib: “Ekologiya və Təbii Sərvətlər Nazirliyinin və İqtisadiyyat Nazirliyinin monitorinq qrupu faydalı qazıntı yataqlarımıza buraxılmadığı üçün bu aksiyada iştirak edərək etirazımızı bildiririk. Müvafiq dövlət qurumlarımızın monitorinqinə şərait yaradılmırsa, deməli, təbii resurslarımızın qanunsuz talanması baş verir və bu, mafioz qruplar tərəfindən həyata keçirilir. Ərazilərimizdə olan təbii sərvətlər Konstitusiyamıza görə xalqındır.
"Biz aksiya vasitəsilə təbii sərvətlərimizin qanunsuz istismarına son qoyulmasına çağırışlar edirik. Çünki hər şey qanuna əsasən tənzimlənməlidir. Həmin ərazilər də sülhməramlıların məsuliyyət zonasına daxil olduğu üçün onlar torpaqlarımızda qanunsuz fəaliyyətin qarşısını almalıdırlar",- deyə o vurğulayıb.
Aksiya iştirakçısı bildirib ki, Azərbaycan dövləti, onun strukturları ərazilərimizdə istənilən monitorinqi həyata keçirmək hüququna malikdir.
Ə. Nuriyev deyib ki, son 30 il ərzində ermənilər torpaqlarımızdakı yataqları qanunsuz istismar ediblər.
