ATƏT PA-da ermənilərin tələbi rədd edildi
"Əldə etdiyimiz uğurlar rəsmi Bakının mövqeyini daha da gücləndirəcək. ATƏT PA-nın qərarı Qərbin də Azərbaycanın mövqeyini dəstəklədiyini, bizim yanımızda olduqlarını göstərir"
“Dağlıq Qarabağ münaqişəsi” və Minsk qrupunun “dirçəldilməsi”, o cümlədən erməni terrorçularının dərhal azad olunması tələbi ATƏT Parlament Assambleyasında rədd edilib. Erməni nümayəndə heyətinin rəhbəri Eduard Ağacanyanın Siyasi məsələlər və təhlükəsizlik üzrə ümumi komitənin Qətnamə layihəsinə daxil etmək məqsədilə hazırladığı dəyişiklik qəbul edilməyib.
Məlum olduğu kimi, Azərbaycan nümayəndə heyəti cari ilin iyulun 2-6-da Böyük Britaniyanın Birminqem şəhərində keçirilən ATƏT PA-nın illik sessiyasında iştirak edir. İllik sessiyada erməni nümayəndə heyəti və ermənipərəst isveçli deputat Bjorn Soder tərəfindən ölkəmizin maraqlarına zidd olan dəyişiklik irəli sürülüb.
Qeyd olunan düzəlişin müzakirəsi zamanı Azərbaycan nümayəndə heyətinin rəhbəri Azay Quliyev erməni nümayəndə heyətinin təklifinə tutarlı arqumentlərlə cavab verərək Assambleyanı müharibədən sonra mövcud olan reallığa zidd dəyişikliyi qəbul etməməyə çağırıb.
Azay Quliyev həbs edilmiş erməni hərbçilərinin müvafiq qanunvericiliyə uyğun olaraq cəzalandırıldığını, bununla bağlı Avropa İnsan Haqları Məhkəməsinin və Beynəlxalq Ədalət Məhkəməsinin müvafiq qərarlarının olduğunu əsas gətirib. Soderin təklifi səsə qoyulsa da, 24 əleyhinə, 12 lehinə olmaqla rədd edilib. Ermənilərin Azərbaycana qarşı qətnamə bəndinin qəbul edilməsi ilə bağlı üçüncü cəhdləri də nəticə verməyib.
Beləliklə, Böyük Britaniyanın Birminqem şəhərində işini davam etdirən ATƏT PA-nın illik sessiyasında Ermənistan tərəfindən Azərbaycan əleyhinə hazırlanan və təqdim olunan bütün düzəlişlərin və təkliflərin qarşısı qətiyyətlə alınıb.
Millət vəkili Ceyhun Məmmədov “Şərq”ə bildirib ki, 44 günlük Vətən müharibəsinin başa çatmasından iki ilə yaxın zaman keçsə də, ermənilər məkirli niyyətlərindən, təxribatlarından əl çəkmirlər. Deputatın sözlərinə görə, beynəlxalq platformalarda, nüfuzlu qurumlarda Azərbaycanın haqlı mövqeyinin qəbul olunması, ermənilərin əsassız təşəbbüslərinin rədd edilməsi çox önəmlidir:
“Bu, erməni yalanlarının ifşa olunması, ermənilərin uydurma təbliğatları üzərində Azərbaycanın növbəti qələbəsidir. Həm də dövlətimizin həyata keçirdiyi uğurlu xarici siyasətin göstəricisidir. Sözsüz ki, ermənilərin pozucu təşəbbüsləri ilə zaman-zaman üzləşəcəyik. Amma əldə etdiyimiz uğurlar rəsmi Bakının mövqeyini daha da gücləndirəcək.
ATƏT PA-nın qərarı Qərbin də Azərbaycanın mövqeyini dəstəklədiyini, bizim yanımızda olduqlarını göstərir. Ermənilərin sülh prosesini pozan, danışıqlara zərbə vuran təxribatçı cəhdlərinin qarşısının alınması vacibdir. İrəvan hökuməti bundan nəticə çıxartmalı, təxribat xarakterli təşəbbüslərə son qoymalıdır. Ermənistan gələcəyə baxmağı bacarmalı, münasibətlərin normallaşması üçün səylər göstərməlidir”.
