“Hesab edirəm ki, Laçında növbəti dəfə baş tutacaq təlimə rus sülhməramlılarından ibarət bir bölük də cəlb etmək möhtəşəm olardı. Buna şahmatda "blokirovka" deyirlər...”.
Bu sözləri Sosial Tədqiqatlar Mərkəzinin mətbuat xidmətinin rəhbəri, beynəlxalq münasibətlər üzrə ekspert Əziz Əlbəyli deyib.
Daha ətraflı “Sherg.az”a danışan analitikin fikrincə, bu, düşmənə ciddi zərbə olar:
“Azərbaycanla Türkiyənin Laçındakı təlimlərindan sonra Ermənistan belə bir rəy yaratmaq istəyəcək ki, guya bu, Rusiyanın Qarabağdakı mövqeyini tapdalayır.
Çünki Moskva hazırda torpaqlarımızda sülhməramlılıq missiyasını yerinə yetirir.
Və ya, ola bilsin, rəsmi Bakını anti-terror əməliyyatlarına vadar etmək və bu zaman rus əsgərinin zərər görməsinə çalışacaqlar. Elə ona görə də ard-arda təxribat törədirlər”
Ə.Əlibəylinin sözlərinə görə, qaldırılan təklif müxtəlif aspektlərdən əhəmiyyətlidir:
“Beləliklə, ilk növbədə Rusiya ilə Ermənistan arasında ixtilaf yaranar və Moskvanın İrəvan tərəfdən təxribatda iştirakı əngəllənər. Eyni zamanda Ermənistanın Rusiya ilə bağlı planları alt-üst olar. Ən mühümü isə budur ki, Azərbaycan- Türkiyə- Pakistan üçbucağında hərbi toqquşma yaratmaq istəyənlərin çirkin niyyətləri suya düşər. Şahmatda buna “Qalaqurma” deyirlər”.
