Özbəkistanın Səmərqənd şəhərində sentyabrın 15-16-da Şanxay Əməkdaşlıq Təşkilatına (ŞƏT) üzv ölkələrin sammiti keçirilib. ŞƏT-in Zirvə toplantısında gündəliyə iki əsas məsələ regionda sülhün, təhlükəsizliyin təmin olunması , eyni zamanda, nəqliyyat kommunikasiya əlaqələrinin qurulması daxil edilib. Zirvə görüşündə Özbəkistan Prezidenti Şavkat Mirziyoyevin dəvəti ilə dövlət başçımız İlham Əliyev də fəxri qonaq qismində iştirak edib.
Politoloq İlqar Vəlizadə ŞƏT-ə üzv ölkələrin sammitindən “Sherg.az”a danışarkən qeyd edib ki, bu toplantıda ölkəmizin gələcək taleyi ilə bağlı bütün məsələlər, xarici siyasətimizin strategiyasına təsir göstərən amillər müzakirə olunub:
“Sammitdə irimiqyaslı nəqliyyat enerji layihələrinin həyata keçirilməsi, digər tərəfdən əsas aparıcı beynəlxalq regional ölkələrlə dialoqlar nəzərə çarpır. Azərbaycan bütün aparıcı Asiya ölkələri ilə faydalı dialoq qurur.
Prezidentimiz dünən Çin Xalq Respublikasının sədri ilə danışıb. Bu danışıq hər iki ölkənin maraqlarına cavab verib. İndi “Bir kəmər, bir yol” layihəsinin reallaşması məsələsi çox önəmli mərhələyə qədəm qoyur.
Çünki onun şimal, Rusiyadan keçən hissəsi demək olar ki, işləmir. Ən işlək faydalı mərkəzi koridor adlanan hissəsi isə məhz Azərbaycandan keçir. Burda bizim üçün ən önəmli məsələlərdən biri də yeni regional dəhlizlərin açılmasıdır. Çin Azərbaycanın mövqeyini , o cümlədən, Zəngəzur dəhlizi ideyasını tam dəstəkləyir. Bu faktor isə Ermənistana əlavə təzyiq vasitəsidir.
Məlumdur ki, rəsmi İrəvan Zəngəzur dəhlizinin hələ də rellaşdırılmamasında əsas səbəbkardır. Paşinyanın son açıqlamaları da Ermənistanın bunu istəmədiyini göstərdi. Bildiyimiz kimi Nikolun başı öz biabırçı siyasətinə qarışdığı üçün ,o, sammitdə iştirak etmədi.
Amma aparıcı regional qüvvələr Çin, Özbəkistan, Qazaxıstan, Rusiya və Türkiyə Zəngəzur dəhlizinin açılmasına maraq göstərirlər. Burda onların özlərinin də iqtisadi maraqları var.
Bu da bizim geosiyasi vəziyyətimizi möhkəmləndirən amildir. Düşünürəm ki, Səmərqənddə keçirilən sammit ümumilikdə bizim diplomatiyamızın Asiyadakı yeni uğuruna imza atacaq”.
