Bölgədə Azərbaycanın dini təsirini İranın əvəzləməsində Gürcüstanın da öz maraqları var
“İranın Borçalıda “dini kanton” yaratmaq imkanı 2011-ci ildə - QMİ təsir gücünü itirməyə başladığı dövrdə yarandı”. Bu barədə “Şərq”ə siyasi şərhçi Asif Nərimanlı deyib. Analitik bildirib ki, Gürcüstanın 2003-cü ildən sonra dini icmaların dövlət nəzarətinə götürülməsi prosesində ilkin hədəfi Rusiya kilsəsinin təsirini azaltmaq idi: “Dalğa 2009-cu ildə Borçalıya da çatdı və QMİ yalnız 3 il - 2011-ci ilə qədər müqavimət göstərməyi bacardı. Ya müqavimət göstərə bilməməkdən, ya da strateji yanlışların nəticəsində, yaxud hər iki səbəbdən Azərbaycan dini təsir gücünü itirdi.
Əvəzində İran aktiv şəkildə bölgəyə daxil oldu. İran hələ 90-cı illərin sonu 2000-ci illərin əvvəlində Qum və Məşhəddən Borçalıya dini emissarlar göndərir. Şərtlərin yaranmasına hazırlaşırdı. Bölgədə Azərbaycanın dini təsirini İranın əvəzləməsində Gürcüstanın da öz maraqları var. 2018-ci ildə bu mövzuları bir az araşdırmışdım.
Hələ o vaxt Borçalı bölgəsində İranın şeyx düzəltdiyi Mirtağı Əsədovun rəhbərliyində 500-dən çox aktiv iştirakçı var idi. İndi sayları bir qədər də artıb. M.Əsədov 2011-ci ildə Azərbaycan vətəndaşlığından imtina edərək, Gürcüstan vətəndaşlığını qəbul etdi. Sonra baş verənlər hər şeyin illərlə hazırlanan planın parçası olduğu aydın olur.
Bölgədə dini təsirin itirilməsi ciddi strateji səhvimiz idi. Bundan sonra Borçalıya yenidən qayıtmaq da asan görünmür”.
