"İran 30 ilə yaxındır ki, Azərbaycanda milyardlarla pul xərcləyərək, özünün şəbəkəsini yetiştirir".
Bunu "Sherg.az"a açıqlamasında Güney Azərbaycanın milli fəalı, Güney Azərbaycan Televiziyasının (GünAzTV) rəhbəri Əhməd Obalı Əhməd Obalı İran cəsus şəbəkəsindən danışarkən deyib.
O vurğulayıb ki, bu agentlərin bəzilərinə İranda, bəziləri isə Azərbaycanda təlim keçirilib:
"Bunun haqqında Azərbaycan Xüsusi Xidmət orqanlarının məlumatı var və şəbəkənin sonunu gətirmək üçün əllərindən gələni edirlər. Lakin bu barədə cəmiyyəti də maarifləndirmək lazımdır. Çünki İran rejimi həm din faktorundan istifadə edərək fanatik bir qrup yaradıb, həm də Azərbaycandan bir qrupu İrana apararaq onlara farsmeyilli dini və hərbi təlimlər verib. Bu isə özünü zəmanət altına almaq istəyən rejimin davamlı siyasətidir. Onlar din faktorundan istifadə edərək, Məşədə, Kərbəlaya zəvvar daşıyıb və farsmeyilli insanlar yetişdirib. Ümumiyyətlə İran dövləti farsçılıq üzərində qurulduğuna görə, türk amili olan Şimali və Cənubi Azərbaycan onun gözündə düşmən sayılır. Bu düşmənçilik isə, ermənilərə dəstək və Azərbaycan əleyhinə açıq-aşkar fəaliyyətdə özünü göstərir".
Ə.Obalının sözlərinə görə, Azərbaycan illərdir İran agentlərinə qarşı inamlı mübarizə aparsa da onların sonu gəlmir:
"Bu isə təbiidir və tezliklə bu şəbəkədən qurtulmaq olmayacaq. Onların davamlı üstünə gedilməli və şəbəkələrini dağıdaraq yenidən qruplaşmalarına imkan verilməməlidir. Digər tərəfdən bu insanları həbsə atmaq kifayət etmir. Həm də ölkədə maarifləndirmə aparılmalıdır. Çünki İran şiə məzhəbini farsçılığın qulluğunda olan bir amil kimi gücləndirib. Şimali və Cənubi Azərbaycandakı ziyalılar millətin bu kəsimini aydınlatmalıdır. Çünki dini İrana yapışdırmaq və şiəliyi farsların qulluğunda göstərmək islamın əleyhinədir. Digər tərəfdən molla rejimi təkcə cəmiyyət arasında yox, həm də Azərbaycanın, siyasətində, akademiyalarında və jurnalistlərin arasında özünə yer açıb. Yəni hərtərəfli hazırlığı var. Bu səbəblə də cəsus şəbəkəsini çökdürməklə paralel olaraq, irançılıq qanunları toplumun bütün kəsimlərindən təmizlənməlidir. Biz də Güney Azərbaycan televiziyası olaraq bu işdə boynumuza düşən milli vəzifəmizi icra edirik. Yəni GünAz TV-yə baxanlara Azərbaycançılıq ideyasının ən vacib önəmi kəsb etdiyini, din və məzhəbin isə insanla Allah arasında bir amil olduğunu çatdırırıq".
Qeyd edək ki, polis əməkdaşlarının keçirdiyi xüsusi əməliyyat zamanı, Narkotik vasitələrin satışından maliyyələşərək Azərbaycanda dini radikalizmin təbliğinə və digər pozuculuq fəaliyyətlərinə cəlb edilən 16 nəfər tutularaq istintaqa təhvil verilib.
Saxlanılan şəxslər dini anlayışı olmayan narkotik aludəçilərini başqa-başqa şəxslərin əli ilə yardım adı altında əməkdaşlığa cəlb edərək narkotik vasitələrin satışını təşkil etməklə “kərimə dövlət”inin əlaqələrini dərinləşdirməyə çalışıblar.
Əsasən İrandan idarə edilən dini-siyasi mərkəzlərin tapşırıqlarını yerinə yetirən şəxslərin məqsədi narkotik aludəçilərini, xurafata meylli şəxsləri öz çirkin niyyətlərinə alət etmək olub.
Polis tərəfindən ifşa olunan növbəti şəbəkə üzvlərinin əlaqələri, onların pozuculuq fəaliyyəti haqqında sosial şəbəkə hesablarında xeyli inkarolunmaz faktlar var.
