Azərbaycanla Ermənistan arasında hərbi əsirlərin növbəti dəyişikliyi baş tutub. Ağdərədə əsir götürülmüş Cəmil Babayev Azərbaycana təhvil verilib. Əvəzində isə iki erməni əsir İrəvana göndərilib. Mübadilə prosesi Qarabağdakı Rusiya sülhməramlı kontingentinin keçmiş komandanı Rüstəm Muradovun vasitəçiliyi ilə baş tutub. Hərbçimiz əvəzində niyə terrorçular qaytarılmalı idi? Axı sülhməramlılar vəzifələrini normal yerinə yetirirlərsə, özləri dərhal Babayevi təhvil verməli idilər. Görünür, “sülhməramlı xəmiri hələ çox su aparacaq”.
“Sherg.az” olaraq rusların oyunları barədə Ağ Partiya sədri Tural Abbaslı ilə həmsöhbət olduq:
- Sözügedən prosesə münasibətiniz necədir?
- Əlbəttə, hərbçimizin qaytarılması yaxşı haldır. Amma bu, erməni terrorçular qarşılığında olmalı deyil. Ən azından ona görə ki, Cəmil Babayev öz torpağına gedib. Və o, hərbi əsir yox, girov hesab edilməlidir. Əgər biz özümüz ermənilərlə mübadilə edəcəyiksə, daha ruslara nə ehtiyac var?! Bu mənada fikrimcə, daha qətiyyətli mövqe sərgiləməli idik. Baş verənlər sülhməramlıların Qarabağda aciz olduqlarını göstərdi.
- Niyə belə düşünürsünüz?
- İki erməninin qaytarılması sülhməramlıların terrorçuların nəzarəti altında fəaliyyət göstərdiyini təsdiqlədi. Yəni onların davranışlarını terrorçular diktə edirlər. Bu isə o deməkdir ki, gələcəkdə Qarabağa hansısa Azərbaycan vətəndaşı getsə, o da eyni aqibəti yaşaya bilər.
- Bunun qarşısını almaq üçün etməliyik?
- Azərbaycanın anti-terrior əməliyyatına başlaması yeganə yoldur.
- Hərbçimizin qaytarılmasının sülhməramlı kontingentin komandanının dəyişməsi ilə eyni vaxta təsadüf etməsi nəyə işarədir?
- Məsələ ondan ibarətdir ki, komandanlıq nəyisə dəyişmir. Onlar sadəcə icraedicidirlər. Bütün hallarda Moskvanın məqsədi Xankəndini üçüncü tərəf kimi göstərib, şüuraltımıza yerləşdirməkdir. Artıq bu istiqamətdə işlər gedir. Mərkli plana imkan verməməli, tutarlı cavabla düşməni susdurmalıyıq.
