İran və Rusiya səfirləri - Seyid Abbas Musəvi və Mixail Evdokimov Bakıda görüş keçiriblər.
Bu barədə Abbas Musəvi X səhifəsində məlumat yayıb.
Diplomatlar İsrail-Fələstin münaqişəsi fonunda Qəzzada baş verən hadisələri, eləcə də Cənubi Qafqazdakı durumu müzakirə ediblər.
Azərbaycana akreditə olunmuş İran və Rusiya səfirlərinin görüşünün normal olduğunu deyən politoloq Sədrəddin Soltan "Sherg.az"a bildirib ki, burada qeyri-adi nəsə axtarmağa ehtiyac yoxdur:
"Çünki Rusiya ilə İranın həm Cənubi Qafqaza, həm Yaxın və Orta Şərqə, həm də Amerika il Avropa İttifaqına qarşı münasibətləri oxşardır. Hətta bir sıra hallarda eynidir. Bu baxımdan onların görüşü qeyri-adi deyil. Məsələn ABŞ-İran və ya ABŞ-Rusiya səfirləri Bakıda görüşsə idi, bu daha qeyri-adi olardı. Bu baxımdan ehtimal edirəm ki, səfirlər daha çox HƏMAS-İsrail hərbi qarşıdurmasını müzakirə ediblər. Həmçinin HƏMAS-ın perspektivdə müqaviməti davam etdirməsi qabiliyyətini, humanitar yardım və İsrail-Fələstin münasibətlərinə aydınlıq gətirə bilərlər".
Analitikin sözlərinə görə, Yaxın və Orta Şərqdə baş verənlərin Cənubi Qafqazdakı hadisələr ciddi təsiri yoxdur:
"Oxşarlıq Yaxın və Orta Şərqdəki aktorların Cənubi Qafqazda da aparıcı olmasıdır. Digər tərəfdən Cənubi Qafqazla bağlı müzakirə olunacaq məsələlər də az deyil. Burada Azərbaycan-Ermənistan münasibətlərinin normallaşması, Zəngəzur dəhlizi, "3+3" formatında əməkdaşlıq məsələsi və.s müzakirə oluna bilər. Yəni Tehran və Moskva arasında ortaq mövqedə olduqları çox məsələlər var. Həmçinin ola bilər ki, hər iki ölkənin səfiri dövlət başçılarının bir-birinə ötürəcəyi məsələləri də çatdırıb".
