Qarabağdakı Rusiya sülhməramlı kontingentinin komandanı vəzifəsini başa vuran general-leytenant Rüstəm Muradov Ermənistanın müdafiə naziri Arşak Karapetyanla görüşüb. Görüşdə R.Muradovu kimin əvəz edəcəyi açıqlanmayıb. Ancaq hələ may ayında Aleksey Avdeyevin rus sülhməramlılarının yeni komandanı ola biləcəyi barədə xəbərlər yayılmışdı. Rusiyanın Ermənistandakı səfirliyinin hərbi attaşesi polkovnik İqor Şerbakovun da iştirak etdiyi görüşdə Qarabağdakı sülhməramlı missiyanın gedişi, Ermənistan-Azərbaycan sərhədindəki vəziyyət müzakirə edilib.
“Sherg.az”olaraq Sosial Tədqiqatlar Mərkəzinin mətbuat xidmətinin rəhbəri, beynəlxalq münasibətlər üzrə ekspert Əziz Əlibəyli ilə dəyişikliyin nələr vəd etdiyi barədə söhbətləşdik:
- Sözügedən məsələni necə qiymətləndirirsiniz?
- Bu, formal dəyişiklikdir. Əslində R.Muradovun əvəzlənməsi vəzifəsinin icrasına başladıqdan altı ay sonra olmalı idi. Amma bu, müəyyən məqamlara görə ləngidi. Yəni komandanın kimin olmasının önəmi yoxdur. Biz onsuz da sülhməramlıların fəaliyyəti ilə bağlı narazılığımızı bildirmişik. Amma müəyyən hüquqi yeniliklər ola bilər.
- Nəyi nəzərdə tutursunuz?
- Sülhməramlıların mandatı müəyyənləşəcək. Bizi narahat edən əsas məsələ üçtərəfli razılaşmanın dördüncü bəndinin hələ də icra olunmaması, yəni terrorçuların torpaqlarımızdan çıxarılmamasıdır. İkinci məqam isə qanunsuz daşınmalardır. Fikrimcə, baş verənlərin məsuliyyət dairəsini müəyyənləşdirən və Azərbaycanın sülhməramlılar üzərində nəzarətini təmin edə bilən hüquqi sənəd hazırlanacaq.
- Moskva yeni komandanlığı bəhanə edərək hərbi əsirimizin qaytarılmasından imtina edə bilərmi?
- Xeyr, bu, mümkünsüzdür. Qarabağda vahid sülhməramlı kontingent var. Və yeni komandanlıq əvvəlkinin varisi hesab olunur.
- Elə isə hərbçimizin taleyi necə olacaq?
- O, mütləq qaytarılacaq. Hətta bu, yeni komandanlığın ilk jesti ola bilər.
