Rusiya hərbi əməliyyatların ikinci mərhələsinə başlayıb
“Rusiya-Ukrayna müharibəsinin tezliklə başa çatacağını proqnozlaşdırmaq çətindir. Amma görünən odur ki, tərəflər buna cəhd göstərir”. Bu sözləri “Şərq”ə açıqlamasında siyasi elmlər doktoru, professor Cümşüd Nuriyev deyib. O bildirib ki, Qərb dövlətləri müharibənin tezliklə sonlanmasında maraqlıdır: “Savaşın hər gün uzanması Qərb ölkələrinin Ukrayna üçün xərclədiyi pulların da artması deməkdir. Burada nüfuz savaşı gedir. Nə Rusiya, nə ABŞ öz istəyinə nail ola bilməyib. Amerikanın Ukraynadakı maraqları təmin olunmayıb.
Ukrayna Prezidenti V.Zelenski İndoneziya vasitəsi ilə Rusiya rəhbəri V.Putinə mesajını çatdırıb. Lakin Rusiya öz istəklərinə nail olanadək hərbi əməliyyatları dayandırmaq fikrində deyil. Reallıq odur ki, müharibə artıq Avropanı da çökdürməyə başlayıb. Xüsusən, Polşa çətin vəziyyətə düşüb, çünki 1,5 milyondan çox qaçqın qəbul edib. Vəziyyət mürəkkəbləşdikcə, Varşava hökuməti ukraynalılara göstərdiyi dəstəyi kəsdi, güzəştləri qaldırdı. Təhlükəni hiss edən Avropa dövlətləri daxilində də müharibə tərəfdarlarının sayı azalmaqdadır”.
C.Nuriyev vurğulayıb ki, Rusiyanın ucuz neftindən, qazından və gübrəsindən məhrum olan Avropada enerji resurslarının qiyməti kəskin bahalaşmaqdadır:
“O səbəbdən həm Ukraynada, həm də Qərb ölkələri arasında savaşın bitməsini arzulayanlar çoxdur. Kiyevin vəziyyəti kifayət qədər ağırdır. Ancaq müharibənin tez zamanda bitməsi ehtimalı azdır. Rusiya hərbi əməliyyatların ikinci mərhələsinə başlayıb. Putin rus hərb-sənayesinin güclənməsindən danışır. Təhlükəsizlik Şurasında Ukraynada aparılan hərbi əməliyyatların gələcəyi müzakirə olunur. Moskva daha uzunmüddətli müharibəyə hazırlaşır. Deməli, Rusiya müharibəni dayandıracaq qədər çöküş yaşamır”.
