2020-ci il Cənubi Qafqazda geosiyasi durumun kifayət qədər dəyişməsi ilə yadda qaldı. İllərdir həllini tapmayan Dağlıq Qarabağ problemi çözüldü, noyabrın 10-da Ermənistan tərəfi kapitulyasiya sənədini imzaladı. Buna rəğmən 2021-ci ildə Qarabağda yenidən müharibənin başlayıb-başlamayacağına dair müəyyən suallar yaranıb və bunun ətrafında müzakirələr aparılır. Ötən il kimi 2021-ci ilin də Azərbaycan diplomatiyası üçün uğurlu olacağı gözlənilir. Hərb meydanında qələbə ilə iş bitmir. Xüsusilə 44 günlük müharibədən sonra bəzi məsələlərin siyasi masada həllinə və aydınlaşdırılmasına ehtiyac var.
Son günlər Rusiya və Ermənistan mediasında da sözügedən mövzuya dair müzakirələr aparılır. Bildirilir ki, Azərbaycan, Ermənistan və Rusiya rəhbərləri arasında üçtərəfli görüş baş tuta bilər. Amma nədənsə Qardaş Türkiyənin bu görüşdə iştirakı barədə fikir yürüdülmür. Səbəblər isə çoxdur.
Səbəblərin dərin qatlarını öyrənmək üçün Azərbaycan Demokrat Partiyasının (ADP) sədri Sərdar Cəlaloğlu ilə əlaqə saxladıq. O “Sherg.az”a bildirdi ki, Azərbaycan tərəfi bu görüşdən imtina etməlidir:
“Kapitulyasiyaya məruz qalan ölkə bütün hərbi texnikası və silahlı qüvvələrin idarəsini qalib tərəfə verməlidir. Bu, Birinci və İkinci Dünya müharibəsində Almaniyanın kapitulyasiyası ilə bağlı həyata keçirilən bir presedentdir.
Hətta Birinci Dünya müharibəsində Almaniyadan minlərlə tank, gəmi və.s tələb ediblər. Ermənistan isə nəinki vurduğu maddi ziyanı ödəyib, hətta kapitulyasının şərtlərinə uyğun olaraq ordusunu təhvil verməyib. Əksinə gün keçdikcə ordusunu silahlandıraraq güclənirlər.
Dağlıq Qarabağla bağlı üçtərəfli bəyanat atəşkəsin dayandırılmasına razılıqdır. Lakin faktiki olaraq Ermənistanla müharibə vəziyyətindəyik”.
ADP sədri vurğulayıb ki, rusların bölgəyə daxil olması Qarabağ problemini olduqca mürəkkəbləşdirdi:
“Ruslar indiyə qədər ermənilərin arxasında durub, siyasətlərini aparırdılarsa, bu gün birbaşa öz adları ilə işğalçılıq siyasətini davam etdirirlər. Belə bir vəziyyətdə üçtərəfli görüşdən imtina etmək lazımdır. Çünki qarşımızda öz maraqlarını müdafiə edən iki dövlət olacaq. Bu mənada Türkiyənin də iştirakı vacibdir”.
