Çin İrandan neft idxalını dayandırıb. Çinin belə addım atmasına səbəb Amerikanın sanksiyalarına tuş gəlməkdir. Məlumdur ki, Amerikanın tələb və istəklərindən biri də Çinin sanksiyalara qoşulması idi. Maraqlıdır, bütün bunlar neftin qiymətinə nə kimi təsirlər göstərəcək?
Mövcud durumla bağlı "Sherg".az - a açıqlama verən Neft Araşdırmalar Fondunun rəhbəri, iqtisadçı İlham Şaban bildirib ki, Çinin Gömrük Komitəsi İrandan neft idxalının sıfıra endirdiyini təsdiq edib:
"Bunu da ABŞ-ın sanksiyaları ilə əlaqələndirirdilər. Çünki əks təqdirdə maliyyə sanksiyaları və fəsadları daha ağır ola bilərdi. Yəni, bütün bunların qlobal şirkətlər üçün mənfi təzahürləri daha çoxdur.
Bütün bunlardan sonra neftin qiymətində artım müşahidə olunması ilə bağlı söz-söhbətlər gedirdi. Ancaq görürük ki, bu gün neftin qiymətində enmələr müşahidə edilir. Çünki artıq İran nefti ilə bağlı bütün risklər əvvəlki dövrdə olurdu.
Ona görə də hazırda neftin qiymətinin düşməsi Çin faktoru və ya digər amillərlə bağlı deyil, ABŞ-da Tramp Administrasiyasının və enerji ehtiyatlarının artımı ilə bağlı olan xəbərlərdən qaynaqlanır. Nəticə etibarı ilə hazırda neftin qiymətində enmələr müşahidə olunur.
Ümumilikdə isə bazar ona köklənir ki, aprelin 19-da Tramp Administrasiyası qərar verdi ki, 8 ölkə mayın 2-dən İrandan neftin idxalını sıfıra endirməlidir. Bu müddət ərzində Yunanistan və İtaliya, idxalı tamamilə sıfırlayıbsa, digər ölkələr də mayın ikinci yarısına qədər həmin idxalı dayandırmaq məcburiyyətində oldular. Bundan sonra biz İran tərəfinin neftinin qiymətinin bahalaşmasını müşahidə etmədik. Çünki onların bazarda kifayət qədər neft təcrübələri var. Buna görə də neftin qiyməti 70 dollar ətrafında olur. Bundan sonra da müəyyən hadisələr ola bilər. Lakin neftin kəskin şəkildə ucuzlaşmasını və yaxud bahalaşmasını müşahidə etməyəcəyik”.
Yeganə Bayramova
