"Açıq - aşkar erməniləri ölkəyə gətirirlər”.
Bunu "Sherg.az”a erməni deputatların bu gün Milli Məclisdə konfransda iştirak etməsi ilə bağlı danışarkən "Qarabağ Qaziləri” İctimai Birliyinin sədri Etimad Əsədov deyib.
O bildirib ki, deputatların ölkəmizə gələcəyi ilə bağlı mətbuatda əvvəldən məlumat yayılıb:
"Müharibə vəziyyətində biz bunu qəbul etmirik. Dəfələrlə xalq diplomatiyası adı altında ermənilərin hüquq müdafiəçilərini, deputatlarını və s. ölkəmizə gətirib yemlədilər. Onlar isə buradan gedəndə Azərbaycanın əleyhinə danışdılar. Ona görə, Azərbaycan ictimaiyyəti – hər bir vətəndaş torpaqlar azad olunmayana qədər ermənilərin ölkəmizə gəlməsini istəmir.
Bu işləri təşkil edən məmurlar, səfirlər, müxtəlif qurumlar hansı məqsədə xidmət edir və bundan nə əldə edirlər, Azərbaycan hansı üstünlüyü qazanır ? Bunu cəmiyyətə açıqlasınlar. Erməni xisləti budur, torpaqlarımızı qaytarmayacaqları ilə bağlı bizi günü-gündən daha çox hədələyirlər. Hazırda Ağdamda ermənilər hərbi təlimlər keçirirlər. Bir müddət əvvəl BMT Təhlükəsizlik Şurasının kürsüsündən işğalçı dövlətin başçısı torpaqları qaytarmayacağını bəyan etdi. Amma bizimkilər sadəlövhcəsinə "ermənilər Bakının gözəlliyini görəcək”, "tolerant olduğumuza şübhə etməyəcək”, "insanlarımızın ermənilərə normal münasibət bəsləməsi aşkar olacaq” və s. fikirlərlə addım atırlar. Bütün bunlar absurddur, boş, mənasız yanaşmalardır".
Qeyd edək ki, Milli Məclisdə "Dayanıqlı İnkişaf Məqsədləri üzrə gender bərabərliyinin və qadın sağlamlığının təşviqinə "Şərq Tərəfdaşlığı" ölkələri parlamentlərinin cəlb edilməsi” mövzusunda konfrans başlayıb. Tədbirdə Ermənistan parlamentinin Xarici Əlaqələr Komitəsinin sədri Armen Aşotyan və deputat Mane Tandilyan da iştirak edirlər.
Aysel Aslan
