"Həm Avropa İttifaqı, həm də Azərbaycan tərəfi əməkdaşlıqla maraqlıdır”.
Bunu "Sherg.az”a açıqlamasında millət vəkili, Vəhdət Partiyasının sədri Tahir Kərimli deyib.
Deputat xatırladıb ki, Avropa İttifaqı digər ölkələrlə əməkdaşlıq üçün vahid sxem hazırlamışdı. Bu sxemə görə, bütün ölkələrə eyni cür münasibət sərgilənir, bənzər motivlərə üstünlük verilirdi:
"Azərbaycan tərəfi buna razılıq vermədi. Vahid sxemdə bütün dövlətlər bərabərləşdirilir. Yəni Azərbaycan torpaqlarının bir hissəsinin Ermənistan tərəfindən işğal olunması faktı vurğulanmır. Ərazi bütövlüyü məsələsi açıqdan-açığa qeyd olunmur. Ona görə də Brüsseldə Aİ ilə Azərbaycan arasında yeni müstəvidə aparılan danışıqlar ölkəmizin mühüm nailiyyətidir. Məhz Azərbaycan tərəfinin tələbi ilə Aİ rəhbərliyi danışıqları fərqli müstəvidə başlatmaq təşəbbüsünü ortaya qoydu. Əslində Avropa ölkələri yaxşı başa düşürlər ki, Azərbaycan hərbi və iqtisadi potensialına görə Cənubi Qafqazda mühüm yerə malikdir. Düşünürəm ki, Azərbaycanda son dönəmlər aparılan geniş islahatlar da Aİ ilə əlaqələrin yenidən qurulmasına şərait yaratdı”.
Parlament üzvü bildirib ki, Avropa üçün əhəmiyyətli olan enerji sahəsində əməkdaşlıq etmək, o cümlədən nəqliyyat-tranzit sahələrində əlaqələr qurmaq Aİ-nin maraqları çərçivəsindədir:
"Cənub Qaz Dəhlizi layihəsi Avropa ölkələrinin enerji təhlükəsizliyində mühüm rol oynayır. Göründüyü kimi Avropa Cənubi Qafqaz regionuna olan marağını sadəcə Gürcüstanla əməkdaşlıq fonunda məhdudlaşdırmaq istəmir.
Artıq Avropa İttifaqı da Azərbaycanın əhəmiyyətini görür, ölkəmizin hüquqi və sivil dövlət olduğunu qəbul edir, multikultural dəyərlərə böyük önəm verir. Azərbaycan dövləti və xalqı bir sıra məsələlərdə dünya ölkələrinə örnək göstərilir. XİN rəhbəri E.Məmmədyarovun da vurğuladığı kimi artıq danışıqlar yekunlaşmağa doğru gedir. Azərbaycanın ərazi bütövlüyünün konkret qeyd olunması bizim üçün böyük uğurdur”.
İsmayıl
