"Avtomobil bazarında yaranmış vəziyyət heç də ürəkaçan deyil”.
Bu barədə "Sherg.az”a maşın bazarındakı son vəziyyəti dəyərləndirərkən "Avtosfer.az" saytının baş redaktoru, nəqliyyat üzrə ekspert Elməddin Muradlı bildirib.
Onun sözlərinə görə, hazırda bazarda elə bir dəyişiklik yoxdur:
"Son zamanlar ölkədə ikinci əl avtomobillər daha yaxşı satılır. Xaricdən gətirilən avtomobillərin sayı çoxalıb. Bu da ölkədə maşına tələbatın artdığını göstərir. Hazırda bazarda müasir avtomobillərə keçid dövrü davam edir. Keçmişdə əhalinin üstünlük verdiyi Rusiya istehsal olan avtomobillər artıq tarixə qovuşur. Qarajlarımızda olan sovet dönəminin maşınları müasirlər avtomobillərlə əvəz olunur. Düşünürəm ki, bu tendensiya yaxşı haldır.
E.Muradlı onu da nəzərə çatdırıb ki, avtomobil bazarında qiymətlərdə dəyişiklik müşahidə olunmur:" Maşına tələbat artdıqca qiymətlər stabil qalır, bəzən də artır. Bazarda tələb təklif paketinin genişlənməsi, əhalinin alıcılıq qabiliyyətinin artması qiymətlərə təsir göstərir. Məncə, bazarda bu kimi faktorlara nazarət olunmalıdır. Çünki bu sahədə müəyyən qrup insanlar var, oturub razılaşıb, danışırlar ki, sabahdan qiyməti qaldırırıq. Beləliklə də bazarda qiymət qalxır. Yaxud da öz siyasətlərini cəmiyyətə bəzən mətbuat üzərindən yeridə bilirlər. Müəyyən saxta fikirlər bildirirlər ki, filan ölkədə maşın bahalaşdı, ona görə qiymətlər qalxır.
Amma məsələni araşdırdıqda görürsən ki, elə bir hal yoxdur. Ölkədə siqaretin qiyməti qalxanda, bazarda maşınlar bahalaşır. Adama sual verərlər ki, siqaretin qiyməti ilə maşının nə əlaqəsi var ? Və ya yağın, elektrik məhsullarının qiymətində artım olur, həmin vaxt avtomobillərin qiyməti bahalaşır. Dəllallar bazarda hegemonluq edir. Bazarda əhalinin alıcılıq qabiliyyəti artan kimi bunlar da öz işlərini görür. Dolların kursu qalxdı, maşın bahalaşdı, dolların kursu endi, avtomobillər ucuzlaşmadı. Düşünürəm ki, bazarda bu qədər özbaşınalıq olmaz. Qonşu Gürcüstanda avtomobillərin qiymətinə nəzər salırsan, müşahidə edirəsən ki, bizdən kəskin dərəcədə fərqlidir.
Azərbaycana maşın yalnız Gürcüstandan gəlmir. Almaniya və başqa dövlətlərdə ölkəmizə gəmi, qatar, şəxsi TIRlarla avtomobil gətirilir. Bundan başqa Azərbaycanda salon işlədən, maşın ticarəti ilə məşğul olanlar da xarici ölkələrdə maşın idxal edir. Lakin gətirdikləri avtomobillərə elə qiymət qoyurlar ki, insan təəccüblənir.
Son zamanlar ölkədə islahatlar həyata keçirildi, gömrük sahəsində müəyyən işlər aparıldı, amma, yenə də baxırsan ki, avtomobillərin qiyməti enmir. Hazırda bazarda belə bir arzolunmaz vəziyyət hökm sürür. Bu sahəyə nəzarət yoxdur, tənzimləmə mexanizmi yaradılmır. Bazar başıpozuq insanların əlindədir. İstədikləri vaxt qiymətləri qaldırır, istədikləri vaxt endirirlər”.
Kənan Eynuroğlu
