Ermənistan Azərbaycanın qoşunların qarşıdurma xəttinə yaxın bölgələrində məskunlaşmış dinc sakinlərinə, o cümlədən qadınlara, uşaqlara və qocalara qarşı sistemli, məqsədyönlü hücumlar həyata keçirir.
"Sherg.az" Trend-ə istinadən xəbər verir ki, bu, Azərbaycanın BMT-də və Cenevrədəki digər təşkilatlardakı daimi nümayəndəliyinin bəyanatında deyilir.
Bəyanatda qeyd olunur ki, Ermənistanın Azərbaycanın dinc sakinlərinə və mülki obyektlərinə hücumları beynəlxalq humanitar hüquq və insan hüquqlarının, o cümlədən Cenevrə Konvensiyasının və bu konvensiyaya 1 nömrəli əlavənin, Uşaq Hüquqları Konvensiyası və insan hüquqlarının və digər azadlıqların müdafiəsi konvensiyalarının kobud şəkildə pozulması deməkdir.
Bəyanatda deyilir: "Erməni qoşunlarının Azərbaycanın işğal olunmuş ərazilərində qeyri-qanuni mövcudluğu cəbhə xəttində uzunmüddətli gərginliyin və davam edən insidentlərin əsas səbəbidir və Ermənistanla Azərbaycan arasında münaqişənin həll olunması qarşısında əsas əngəldir. 2017-ci ilin iyununda ATƏT-in Minsk qrupu həmsədrlərinin regiona səfərindən sonra onlar münaqişədə substantiv danışıqlara başlamağı təklif edərək status-kvonun dəyişdirilməsinə çağırıb. Lakin Ermənistan tərəfi bu çağırışlara dinc sakinlərin qətli ilə qarşılıq verdi. Vəziyyəti gərginləşdirməklə Ermənistan münaqişənin nizamlanmasını zərbə altına qoymaq məqsədi güdür”.
Bəyanatda o da vurğulanır ki, Azərbaycan beynəlxalq ictimaiyyəti Ermənistandan Azərbaycan torpaqlarının qanunsuz işğalını dayandırmağı, qoşunlarını işğal olunmuş ərazilərdən çıxarmağı və münaqişənin həlli prosesində konstruktiv iştirakını tələb etməyə çağırıb.
Bəyanatda qeyd olunur: "Hazırkı vəziyyətlə bağlı məsuliyyət tamamilə Ermənistanın siyasi-hərbi rəhbərliyinin üzərindədir”.
