"Tacikistan və Azərbaycan arasında uzun illərdir siyasi dialoq mövcuddur”.
Bu barədə "Sherg.az”a Tacikistan prezidentinin Azərbaycana səfəri haqqında danışarkən politoloq İlqar Vəlizadə bildirib.
O qeyd edib ki, 2007-ci ildən indiyə qədər Azərbaycan və Tacikistan prezidentləri qarşılıqlı səfərlər həyata keçirir, əhəmiyyətli müzakirələr aparırlar:
"Hazırda Azərbaycan regionda irimiqyaslı nəqliyyat layihələri həyata keçirir. Tacikistan isə bu layihələrdə iştirak etmək niyyətindədir. Artıq ölkələr arasında belə razılıq olunub ki, Azərbaycan Tacikistan vasitəsilə Avropaya bir sıra məhsulların daşınmasını həyata keçirilsin. Eyni zamanda ikitərəfli aviareyslərin açılması barədə söhbətlər keçiriləcək.
Müzakirə olunacaq beynəlxalq mövzuların içərisində xüsusi çəkiyə malik olan məsələ Əfqanıstan mövzusudur. Tacikistan bu ölkə ilə həmsərhəddir. Azərbaycan isə Əfqanıstanla bağlı bir çox layihələrdə iştirak edir. Azərbaycan vasitəsilə Əfqanıstana müxtəlif yüklər daşınır. Bu ölkədə sabitliyin təmin olunması, təhlükəsizlik problemlərinin həll olunması hər iki ölkə üçün əhəmiyyətlidir.
Terrorizmlə mübarizədə Azərbaycan regionda mühüm rola malik olan ölkədir. Tacikistanın da bu məsələdə müəyyən risklərlə qarşılaşdığını nəzərə alsaq, bu da önəmli müzakirələr sırasına daxil olacaq”.
Aysel Aslan
