"Ermənilərlə yaxın qohumluğu olan şəxsin diaspor rəhbəri kimi məsuliyyətli vəzifədə çalışmasını düzgün hesab etmirəm”.
Bunu "Sherg.az”a Rusiyada fəaliyyət göstərən Azərbaycan Milli Mədəni Muxtariyyətinin Moskva regional bölməsinin sədri Ağadadaş Kərimovun qızını erməni biznesmenə ərə verməsi məsələsinə münasibət bildirərkən millət vəkili Elman Məmmədov deyib.
Parlamentari vurğulayıb ki, Rusiyada yaşayan və diaspor təşkilatı ətrafında birləşən azərbaycanlılar bununla bağlı qərar verməlidirlər:
"Həmin soydaşlarımız müəyyən etməlidirlər ki, ermənilərlə sıx qohumluğu olan şəxs onlara rəhbərlik edə bilər, yoxsa yox. Söz onlarındır. Mən isə sadəcə şəxsi fikrimi bildirdim. Ağadadaş Kərimov sıradan vətəndaş deyil. O, azərbaycanlıları birləşdirən əhəmiyyətli təşkilata rəhbərlik edirsə, məsələ tamamilə başqa müstəviyə çəkilir.
Ümumilikdə isə kiminsə xarici ölkədə erməni ilə ailə qurması, qohumunun erməni olması özünün şəxsi məsələsidir. Sadəcə diaspor kimi məsuliyyətli qurumun məsuliyyətini özündə daşıyan şəxs milli, mədəni dəyərlərimizi, mentalitetimizi nə dərəcədə müdafiə edə bilər? – bunu aydınlaşdırmaq vacibdir”.
Qeyd edək ki, A. Kərimov yayılan xəbərlərin doğruluğunu təsdiq edib, o qızını erməni milliyyətindən olan şəxsə ərə verdiyinə görə peşman olmadığını dilə gətirib: "Qızımın erməni oğlanla ailə həyatı qurmağı doğrudur. Bunu bütün dost-tanışlar illərdir ki, bilirlər. Bu normal hadisədir. Həyat yoldaşım da milliyətcə ermənidir. Oğlanın atası, babası Gürcüstandan gələn ermənilərdir. Oğlan burada anadan olub. Erməni dilində danışa da bilmir. KVN-də iştirak edib, qızım da ora gedib-gəlirdi. Orada tanış olublar”.
Aysel Aslan
