"Azerspace-2” peykinin orbitə buraxılması ölkəmizin dünyadakı mövqeyini möhkəmləndirəcək".
Bu sözləri "Sherg.az"a internet-media ekspert Səbuhi Abbasov Azərbaycanın üçüncü peyki – "Azerspace-2” telekommunikasiya peykinin orbitə buraxılmasına münasibət bildirərkən deyib.
Onun sözlərinə görə, Azərbaycan telekommunikasiya sahəsində son 10 ildə kifayət qədər ciddi addımlar atıb:
"Bundan öncə orbitə buraxılan peykimiz dünya səviyyəsində rezonans doğurdu, ölkəmizin geostrateji mövqeləri daha da möhkəmləndi. İkinci peykin buraxılması isə ölkəmizin beynəlxalq telekommunikasiya asılılığını minimuma endirəcək. Eyni zamanda bir çox dövlətlər bizim peykin xidmətlərindən istifadə edəcəklər. Bu da öz növbəsində iqtisadi dividentlərin daha da artacağından xəbər verir. Bu prosesin daha bir tərəfi isə informasiya təhlükəsizliyinin təminatı ilə bağlıdır. Bütövlükdə ikinci peykimiz ölkəmizin qüdrətinin daha da artmasına xidmət edəcək".Qeyd edək ki, bu gün Azərbaycanın "Azerspace-2” peyki Fransa Qvianasında yerləşən Kuru kosmodromundan orbitə buraxılıb.Məlumata görə, "Azerspace-2” orbitə "Ariane 5” daşıyıcı raketlə göndərilib. "Ariane 5” yubiley - 100-cü buraxılışında "Azerspace-2” peykindən əlavə, Yaponiyaya məxsus "Horizons 3e” peykini də orbitə çatdırıb. "Azerspace-2” peykinin siqnalı Avropa, Cənub-Qərbi Asiya, Yaxın Şərq və Afrika ölkələrini əhatə edəcək. Peyk orbitdə ən azı 15 il qalacaq.
Ayyət Əhməd
