"Elman Rüstəmov manatın məzənnəsi ilə bağlı fikirlərində haqlıdır”.
Bunu "Sherg.az”a baş bankirin milli valyutanın məzənnəsinin sabitləşməsi haqqında açıqlamalarına münasibət bildirərkən iqtisadçı millət vəkili Vahid Əhmədov deyib.
Deputatın sözlərinə görə, E.Rüstəmovun apardığı siyasət, manatın qorunub saxlanması, pul kütləsinə nəzarət mexanizminin gücləndirilməsi, idxal-ixrac əməliyyatları və s. göstərir ki, hələlik nəzarət olunur:
"Düşünürəm ki, milli valyutanın məzənnəsində ilin sonuna qədər ciddi problem olmamalıdır.
Gələn il dəyişiklik olub-olmayacağını isə əvvəldən proqnozlaşdırmaq çətindir. Bu ilin yekunlarının necə olmasından çox şey asılıdır. Ümum daxili məhsulun artımı, inflyasiyanın səviyyəsi, gələn ilə hansı baza ilə daxil olmağımız və s. bu proseslərə təsir edəcək”.
Strateji Yol Xəritəsinin icrasına toxunan V.Əhmədovun fikrincə, bundan çox şey asılıdır:
"Çünki Strateji Yol Xəritəsi yüz faiz yerinə yetirilsə, gələn il qeyri-neft sektorunda böyük inkişaf olacaq və çox sayda gəlirlər əldə ediləcək.
Həmçinin son vaxtlar ölkə başçısı özü bu məsələyə nəzarət mexanizmini həyata keçirir. Pul kütləsinə nəzarətin ciddi aparılması mühüm məsələdir. Əlavə pul kütləsi dövriyyəyə buraxılmır.
Real sektorun inkişafına gəlincə isə ili 2,5 – 3 faiz ümumi daxili məhsulun artımı ilə başa vura bilsək, bu, yaxşıdır. Lakin mənfi hal baş verərsə, problem yarana bilər.
Ümumiyyətlə isə, ilin sonuna kimi manatın qorunub saxlanacağını güman edirəm”.
Aysel Aslan
