Rusiyada, eləcə də bir sıra Avropa ölkələrində əhali arasında kəskin respirator virus infeksiyaları və qripin yayılmasının qarşısını almaq üçün payız-qış mövsümü ərəfəsində insanlar qripə qarşı pulsuz peyvənd edilirlər. Qonşu Gürcüstanda isə əhalinin risk qrupuna daxil olan müəyyən təbəqəsi - 18 yaşadək uşaqlar, xroniki xəstələr, sığınacaqlarda yaşayan yaşlı insanlar qripə qarşı pulsuz peyvənd olunur. Bu barədə Respublika Gigiyena və Epidemiologiya Mərkəzinin Hava-damcı infeksiyaları bölməsinin həkim-epidemioloqu Nəzmiyyə Brumendfard məlumat verib.
Həkimin sözlərinə görə, Azərbaycanda qripə qarşı epidemioloji vəziyyət icazə verilən həddi keçmədiyi üçün qripə qarşı peyvəndin milli peyvənd təqviminə daxil edilməsi (milli peyvənd təqviminə daxil olan peyvəndlər məcburi qaydada və pulsuz həyata keçirilir) məqsədəuyğun sayılmır.
Epidemioloq bildirib ki, Azərbaycanda apteklərdə vaksinlərin satılmasına icazə verilmir: "Çünki vaksinlərin xüsusi saxlanılma qaydaları var, "soyuq zəncir" prinsiplərinə riayət olunmalıdır. Vaksinlər istehsalçıdan peyvənd olunan şəxsə qədər yalnız soyuducu rejimi gözləmək şərtilə saxlanılmalıdır. Peyvənd yalnız tibb müəssisələrində vurulmalıdır. Onlar "soyuq zəncir" rejiminə riayət edilmək şərtilə həmin müəssisələrə çatdırılır".
Ölkəmizdə qrip və digər infeksiyalara qarşı peyvəndlərin vurulmasına ehtiyac olmadığını deyən həkim-allerqoloq Şahvələd Məmmədov "Şərq”ə bildirib ki, Azərbaycan cənub ölkəsi olduğu üçün infeksiyalar özünü ağır şəkildə büruzə vermir:
"Son illər dünyada "Quş qripi"ndən tutmuş "Donuz qripi"nə kimi təhlükəli viruslar yayılmaqdadır. Ölkəmizin iqlim şəraiti elədir ki, ağır və təhlükəli infeksiyalar yayılmır. Bu barədə hər il Səhiyyə Nazirliyində müəyyən məsləhətlər olur. Ona görə də xərc çəkib peyvəndlər etməyə ehtiyac yoxdur.
Rusiya ilə Azərbaycanı müqayisə edə bilmərik. Moskva kimi meqapolis şəhəri epidemiya bürüsə, görün nələr olar. Bizdə isə o dərəcədə ağır infeksiyalar olmur. Bildiyiniz kimi, 11 yaşa qədər uşaqlara profilaktik peyvəndlər vurulur. Bunlar göy öskürək, difteriya, tetanus və ya digər peyvəndlərdir. Bu peyvəndlər dünyanın hər yerində olduğu kimi ölkəmizdə də var. Lakin hazırkı durumda Azərbaycanda qrip əleyhinə təcili vaksinlərə ehtiyac yoxdur” .
Yeganə Bayramova
