Vergilər naziri Fazil Məmmədov Milli Məclisin İqtisadi siyasət, sənaye və sahibkarlıq, eləcə də Hüquq siyasəti və dövlət quruculuğu komitələrinin birgə iclasında ölkəmizə idxal olunan minik avtomobillərinə, istirahət və ya idman üçün yaxtalara və bu məqsədlər üçün nəzərdə tutulan digər üzən vasitələrə görə aksiz dərəcəsinin artırılması barədə məlumat verib.
Onun sözlərinə görə, bununla bağlı Vergi Məcəlləsinə dəyişikliyin edilməsi nəzərdə tutulur. Qanun layihəsinə əsasən, mühərrikin həcmi 2000 kubsantimetrədək olan minik avtomobilləri üçün aksiz dərəcəsi dəyişməyib. Lakin, mühərrikin həcmi 3000 kubsantimetrədək olduqda 400 manat və əlavə olaraq mühərrikin həcminin 2001-3000 kubsantimetr hissəsi üçün hər kubsantimetrə görə 3 manat aksiz dərəcəsi müəyyənləşdirilib. Buna qədər belə avtomobillərin idxalı zamanı 400 manat və əlavə olaraq mühərrikin həcminin 2001-3000 kubsantimetr hissəsi üçün hər kubsantimetrə görə 1,5 manat aksiz dərəcəsi ödənilirdi.
Məsələ ilə bağlı "Şərq”ə danışan "Digesta” hüquq firmasının direktoru, nəqliyyat üzrə ekspert Ərşad Hüseynov dəbdəbəli avtomobillərin aksiz dərəcəsinin artmasının düzgün olduğunu söyləyib:
"Son illərdə xaricdən idxal edilən avtomobillər üçün bir neçə dəfə aksiz vergisi qaldırılıb. Aksiz vergisi mühərrikin iş həcminin kəmiyyətinə görə hesablanır. Dünyanın hər yerində mühərrikin iş həcmi kiçik olan avtomobillərə daha az aksiz vergisi tətbiq olunur və insanlara bildirilir ki, az yanacaq işlətsin və ətraf mühiti az çirkləndirsin. Bütün sosial təbəqələrin maddi imkanları bu cür avtomobilləri almağa imkan verir. Amma təxminən "supercar” istiqamətində gedən, nisbətən komfortlu, dəbdəbəli, mühərrikin iş həcmi böyük olan və başqa texniki göstəriciləri bahalı olan avtomobillərə yüksək qiymətli aksiz tətbiq edirlər. Yanaşma isə belədir ki, o avtomobilləri ala bilən adam zəhmət çəksin, bir az əlavə vergi ödəsin. Ölkəmizi İranla müqayisə eləsək, orda aksiz vergisi bizdən 3-4 dəfə artıqdır. İranda bu təkcə büdcəni artırmaq üçün deyil, həm də daxili avtomobil istehsalını qorumaq üçündür. Düzdü, bizdə daxili avtomobil istehsalı elə də əhəmiyyətli deyil. Amma, hər halda komfortlu avtomobillər hesabına özünü başqalarından fərqləndirmək istəyən adamlardan daha çox vergi alınması başadüşüləndir və hər yerdə qəbul olunmuş bir normadır”.
Yeganə Bayramova
