"Azərbaycanda 92 markalı - qiyməti dövlət tərəfindən tənzimlənən benzinin qiymətində yenicə artım olub”.
Bunu "Sherg.az”a qonşu Rusiyada benzinin qiymətinin artmasının Azərbaycana təsirlərindən danışarkən iqtisadçı ekspert Natiq Cəfərli deyib.
O bildirib ki, yaxın zamanlarda yenidən bahalaşma olacağı gözlənilmir:
"Lakin dizel yanacağının bahalaşacağı ilə bağlı fikirlər dolaşır. Dizel yanacağının qiyməti 92 markalı benzinin qiymətindən xeyli ucuzdur. Ola bilər, aqrar mövsüm bitdikdən sonra, dekabr ayında dizellə bağlı qərar verilsin.
Rusiyada sadəcə aksiz vergisini qaldırıblar. Ona görə, benzinin qiymətinin qalxması gündəmə gəldi. Həm də bu dövlətdə qiymətlər bazar qaydalarına uyğun müəyyənləşir. Rusiyanın bölgələrində qiymət fərqi var. Moskva, Sankt-Peterburq kimi şəhərlərdə benzin daha bahadır, ucqarlarda isə ucuzdur. Həm alıcılıq qabiliyyəti, həm logistika, həm də vergilər nəzərə alınır.
Azərbaycanda isə 92 markalı benzin sırf dövlət nəzarətində, tənzimlənən qiymətlərdədir. Ona görə, belə artım yaxın zamanlarda gözlənilmir.
İlin sonuna qədər isə dizel yanacağı ilə bağlı qərar verilə bilər. Təxminən 15-20 faiz bahalaşma ola bilər”.
Qeyd edək ki, Səudiyyə Ərəbistanından sonra Rusiya hökuməti də yanacaq aksizlərini əlavə olaraq artırmaq qərarı alıb. Artımın iki mərhələdə həyata keçiriləcəyi və hər dəfə yanacağın litr qiymətinin 0,5 rubl (8,6 sent) artacağı nəzərdə tutulub. Artımın dövlət büdcəsinə 60 mlrd. rubl və ya 1,03 mlrd. ABŞ dolları əlavə gəlir gətirəcəyi gözlənilir.
Xatırladaq ki, hazırda Rusiyada 92 oktanlı benzinin litrinin qiyməti təxminən 37 rubl (0,64 sent) təşkil edir. Bu da o deməkdir ki, artım təxminən 1,3%-ə bərabər olacaq.
Aysel Aslan
