Məlumdur ki, ötən gün "Milli Şura” adlanan qurum və AXCP-nin Milli Dirçəliş Günü ilə bağlı keçirmək istədiyi qanunsuz aksiya baş tutmayıb. Çünki bu tipli aksiyaların keçirilməsi ilə bağlı cəmiyyətin sosial sifarişi yoxdur. Azərbaycan cəmiyyəti kifayət qədər yetkindir və milli maraqlarla izah edilə bilməyən və inkişaf üçün perspektivlər vəd etməyən heç bir sosial-siyasi aksiyanı dəstəkləmir. Əslində hamıya məlumdur ki, aksiyanın keçirilməsində məqsəd Milli Dirçəliş Günü deyil, radikal müxalifətin özünü xatırlatma və gündəmdə qalma cəhdidir.
Belə aksiya müəyyən məqsədlərə xidmət etdiyi və sabitliyi pozma cəhdləri kimi qiymətləndirildiyi üçün əsla dəstək görmür. Marginal radikal qrupların məqsədi qanunsuz aksiya vasitəsilə polislə süni qarşıdurma yaratmaq, hakimiyyətə qarşı yeni ittiham hədəfləri əldə etmək niyyəti idi. Ancaq hüquq-mühafizə orqanları təxribatçıların qarşısını ən sivil şəkildə aldı. Ən əsası isə polislərimiz radikal ünsürlərin Şəhidlər Xiyabanı kimi müqəddəs ziyarətgahımızı siyasi spekulyasiya meydanına çevirməsinə imkan vermədi. Ümumiyyətlə, Azərbaycan müxalifəti hər zaman dağıdıcılıq mövqeyində dayanıb. Sabitliyi pozmağa, ara qarışdırmağa çalışıblar. Təbii ki, onların bədnam niyyəti heç zaman baş tutmayacaq. Çünki Azərbaycan xalqı daim dövlətinin və Prezidentinin yanındadır.
Təxribatçı qrupların qanunsuz cəhdləri ilə bağlı "Şərq”ə danışan "Bakı-xəbər” qəzetinin baş redaktoru Aydın Quliyev deyib ki, hüquq-mühafizə orqanlarının radikal qrupların təxribatının qarşısını almaq üçün atdığı addımlar qanuni və sivil dövlətçilik təcrübəsinə uyğundur. Baş redaktor bildirib ki, bu addımları kimlərinsə müəyyən təzyiq, təsir və "polis zorakılığı” kimi təqdim etməyə çalışmasının heç bir perspektivi yoxdur:
"Bu cür radikal olaylar üzərindən Azərbaycanda müəyyən qrupların təsir altında olması barədə görüntü yaratmaq cəhdləri səmərəsizdir. Ölkəmizdə hərtərəfli, dərin dövlət quruculuğu gedir. Bu prosesin içərisində iqtisadiyyat, sosial sfera, mədəniyyət, incəsənət və bütün sahələr əhatə olunur. Eyni zamanda tariximiz üçün əziz olan mühüm hadisələrin və günlərin rəmzləşdirilməsi lazımi qaydada rəsmi surətdə aparılır. O cümlədən Azərbaycanın Müstəqillik, Ordu Quruculuğu, Milli Dirçəliş Günü, müxtəlif dövlət orqanlarının, peşə sahiblərinin bayramları lazımi səviyyədə simvollaşdırılır. Dövlətin hərtərəfli dəstəyi nümayiş edilir”.
A.Quliyev bəyan edib ki, Milli Dirçəliş Günü bütün azərbaycanlılar üçün əziz və doğmadır:
"Dövlət orqanları Milli Dirçəliş tariximizin əbədiləşdirilməsi üçün lazım olan addımları atır. Belə bir günün qeyd olunması heç bir siyasi qüvvə tərəfindən inhisara alına, ən əsası isə radikal və dağıdıcı formada həyata keçirilə bilməz. Dövlət orqanları Milli Dirçəliş Gününü sivil və rəsmi qaydada, cəmiyyətin mütləq əksəriyyətinin iştirakı ilə həyata keçirir. Müəyyən siyasi qrupların `
bunu cəmiyyətin qəbul etmədiyi, xoflandığı, narahat olduğu radikal üsullarla icra etməsinin heç bir mənası və əhəmiyyəti yoxdur. Milli Dirçəliş Gününün radikal formada qeyd edilməsi dəyərə çevrilmiş o günün əhəmiyyətini azaldır. Həmin qüvvələr bunu nəzərə almalıdır”.
İsmayıl
