“O, konkret rayon adı çəkməyib. İndidən Şuşa, Laçın və Kəlbəcərin qaytarılmayacağı düşüncəsinə qapılmaq yanlışdır”
Ermənistan XİN başçısı Edvard Nalbandyan ilk dəfə işğal altında olan Azərbaycan ərazilərinin qaytarılmasından danışıb. Nazir bildirib ki, Qarabağa təhlükəsizlik və inkişaf nöqteyi-nəzərindən təhlükə yaratmayan torpaqlar geri verilə bilər. Erməni nazirin açıqlaması ekspertlər tərəfindən müxtəlif aspektlərdən dəyərləndirilib.
Əksər analitiklər bildiriblər ki, sadəcə 5 rayonun qaytarılması keçmiş danışıqların predmetidir. Əgər Nalbandyan işğal altındakı bütün torpaqların qaytarılmasından danışsaydı, o zaman yenilik etmiş olardı. Nazir deyir ki, təhlükə törətməyən, yəni uzaq başı 5 rayon qaytarıla bilər. Deməli, Kəlbəcər, Şuşa və Laçın boşaldılan rayonların içərisində yoxdur. Həmçinin, 5 rayonun geri verilməsi əvəzində bizdən nə tələb olunur, o məsələ də qaranlıq qalır. Proseslərə başqa prizmadan baxan siyasi şərhçilər düşmən ölkənin ciddi təzyiqlərə məruz qaldığını iddia ediblər.
Rezonansa səbəb olan açıqlama ilə bağlı "Şərq”ə danışan millət vəkili, siyasi elmlər doktoru Elman Nəsirovun sözlərinə görə, Nalbandyanın son bəyanatı münaqişənin həlli ilə bağlı Ermənistana təzyiqlərin artdığını göstərir.
Deputat bildirib ki, nazir indiyə qədər bu cür konkret açıqlama ilə gündəmə gəlməyib:
"Məlumdur ki, işğalçı Ermənistan heç vaxt torpaqların geri qaytarılması məsələsinin üzərinə gəlmək istəməyib. Lakin indi düşmənin mövqeyi kifayət qədər yumşalıb. Məncə, bu, hər şeydən əvvəl Azərbaycanın qazandığı diplomatik uğurlar və aprel döyüşlərindən sonra meydana çıxan hərbi üstünlüyümüzlə bağlıdır. Görünür, bu proseslərdən sonra düşmən ölkəyə təzyiqlər güclənib”.
Politoloq hansı rayonların qaytarıla biləcəyi ehtimalına da münasibət bildirib:
"Nalbandyan vurğulayıb ki, Dağlıq Qarabağa təhlükə yaratmayan ərazilərin qaytarılmasından söhbət gedir. Əlbəttə, hansı rayonların verilib-verilməyəcəyini erməni nazir müəyyən etmir. Proses ATƏT-in Minsk Qrupunun vasitəçiliyi ilə aparılan danışıqların nəticəsinə uyğun olaraq həyata keçirilir. Əvvəllər də bu cür fikirlər səsləndirilib. Torpaqlar "2+5” formatı ilə qaytarılsın, yəni əvvəlcə iki rayon, sonra beş rayon geri verilsin. Amma burada konkret rayon adı çəkilməyib. İndidən Şuşa, Laçın və Kəlbəcərin qaytarılmayacağı düşüncəsinə qapılmaq yanlışdır. Ermənistanın XİN rəhbəri heç bir məsələni həll etmək iqtidarında deyil. Şübhəsiz ki, Azərbaycanın hədəfi 7 rayonun qaytarılmasıdır. Daha sonra isə Dağlıq Qarabağın aralıq və yekun statusu məsələsi gündəmə gətirilə bilər”.
İsmayıl
