"Eldar Əzizov həmişə yeni yanaşması ilə diqqət çəkib. O, müasir çağırışları anlayan, ən önəmlisi də cənab Prezidentin siyasətini yetərincə mənimsəmiş biridir”.
Bunu "Sherg.az”a açıqlamasında Mətbuat Şurasının İdarə Heyətinin üzvü, tanınmış jurnalist Azər Həsrət deyib.
Media nümayəndəsi bildirib ki, adı korrupsiyada hallanmır, insanlarla ünsiyyət problemi yoxdur. Mediaya açıq birisidir.
Üstəlik də yetərincə idarəetmə və siyasi təcrübəsi olan kadrdır. O baxımdan düşünürəm ki, E.Əzizovun Bakının rəhbəri kimi fəaliyyəti uğurlu olacaq. Müavin kimi son bir neçə ayda gördüyü işlər bunu deməyə əsas verir. Biz də media təmsilçiləri olaraq əlimizdən gələni etməliyik. Yəni paytaxtda nəzərə çarpan neqativ halları daha çox işıqlandırmalıyıq ki, yeni merin şəhərlə bağlı görmək istədiyi işlərə yardımçı olaq. Onu da bilirəm ki, Eldar müəllim medianı yaxından və şəxsən izləyir. Biz də öz xidmətimizi göstərməliyik ki, şəhərimiz məcara və təcrübə meydançasına çevrilməsin”.
Qeyd edək ki, Prezident İlham Əliyevin sərəncamı ilə Eldar Əzizov Bakı Şəhər İcra Hakimiyyətinin başçısı təyin olunub. Eldar Əzizov bir müddətdir Bakı şəhər İcra Hakimiyyəti başçısının müavini kimi mer səlahiyyətlərini icra edirdi. Onun məmur kimi fəaliyyətinin böyük bir hissəsi məhz icra başçısı postu olub. Əvvəlcə Bakının Nizami rayonuna, ardınca Gəncə və Sumqayıt şəhərlərinə, ən sonda Səbail rayonuna rəhbərlik edib. Bakının yeni meri Azərbaycan Jurnalistlər Birliyinin üzvü, "Difai” kitabının və 200-dən artıq məqalənin müəllifidir.
İsmayıl
