Ermənistanın Avronest Parlament Assambleyasındakı nümayəndə heyətinin rəhbəri Armen Aşotyanın başçılığı ilə bir qrup erməni deputatın Bakıya gələcəyi xəbəri yayılıb. Armen Aşotyanın feysbuk səhifəsində yazdığına görə, onlar sentyabrın 22-də Bakıda keçiriləcək Avronest Parlament Assambleyasının (PA) təşkil etdiyi forum çərçivəsində "Şərq tərəfdaşlığı” proqramı ölkələrində gender bərabərliyi məsələlərinin müzakirəsində iştirak edəcəklər.
Bəs, ictimaiyyət üzvlərinin beynəlxalq qurumlar çərçivəsində Qarabağla bağlı müzakirələrdən gözləntiləriniz nələrdir? Erməni deputatlarının Bakı səfəri ilə bağlı hansısa etirazlar ola bilərmi?
Milli Məclisin Təhlükəsizlik və müdafiə komitəsinin üzvü, millət vəkili Elman Məmmədov da erməni deputatların Bakıya gəlməsinin əleyhinə olduğunu deyib:
"O murdarların Bakıya gəlib-gəlməməsi Qarabağ münaqişəsinin həlli prosesində heç bir əhəmiyyət kəsb eləmir. Amma bir deputat və Xocalı soyqırımının ağrı-acısını ürəyində hiss edən bir məcburi köçkün olaraq, ermənilərin Azərbaycana ayaq basmasına razı deyiləm. Nə qədər ki bizim torpaqlarımız onların işğalı altındadır və nə qədər ki ərazi bütövlüyümüz bərpa olunmayıb və ordularımız cəbhədə üz-üzə dayanıb, hər hansı bir erməninin Bakıya ayaq basmasının əleyhinəyəm. Hər zaman da bu mövqeyimə sadiq qalmışam. Kim dəvət edib, nə məqsədlə dəvət edib, necə qəbul edirlər öz işləridir. Mən bunu qəbul etmirəm.
Düzdür, bəziləri hesab edir ki, ermənilərin Azərbaycana gəlmələri, bizim inkişafımızı görmələri müsbət haldır, lakin mən heç cür onların bizim torpaqlara ayaq basmasını qəbul edə bilmirəm. Düşmən torpağımı işğal altında saxlayır. Mənə qarşı soyqırım törədib, düşmənçilik edir. İstər deputat olsun, istər başqa biri, onun mənim torpağımda nə işi var? Mənim mövqeyim belədir. Adı nə olursa olsun, bu məsələyə əqidə ilə yanaşıram”.
Şəymən
