Ermənilər növbəti dəfə Azərbaycanın milli musiqisini oğurlayaraq özlərinki kimi təqdim ediblər. Oktyabrın 11-də İrəvanda 58 ölkəni birləşdirən Frankofoniya sammiti keçirilib. Əvvəllər ciddi beynəlxalq konfranslara ev sahibliyi etməmiş Ermənistan bu tədbirə Azərbaycana qarşı təxribat fürsəti kimi baxıb. Əvvəlcə İrəvanda açılan "Frankofoniya şəhərciyi”ndə Azərbaycanın işğal edilmiş Dağlıq Qarabağ bölgəsi Ermənistan pavilyonu nəzdində təqdim edilib. Amma işğalçı ölkənin siyasi rəhbərliyi bununla kifayətlənməyib. Frankofoniya sammitinin rəsmi hissəsi başa çatandan sonra gəzinti və ziyafət təşkil edilib. Ziyafətdə səslənən musiqilər isə Azərbaycandan oğurlanma musiqilər olub. Ermənistanın baş naziri Nikol Paşinyan, tədbirdə iştirak edən dövlət və hökumət başçıları, eləcə də başqa ölkələrin rəsmləri ziyafət zamanı erməni musiqisi kimi səsləndirilən Azərbaycan rəqs havalarına oynayıblar. Ermənistan sammitdə Azərbaycanın "Duy-duy”, "Xurcunu” və "Basqalı” rəqslərini iştirakçılara təqdim edib.
İşğalçı ölkənin məlum addımını kəskin pisləyən millət vəkili Araz Əlizadə "Sherg.az"a bildirib ki, bu ermənilərin ilk işi deyil:
"Ermənilər hər zaman digər dövlətlərdən nələrsə oğurlayırlar. İşğalçı ölkənin Azərbaycanın milli musiqisini özlərinin mahnısı kimi qələmə verməsi təəccüb doğurmamalıdır. Baxın, erməni bəstəkar Aram Xaçaturyan öz tərcümeyi-halında yazır ki, ""Qayane” və "Spartakı” yazanda Azərbaycan muğamlarından istifadə edib. Yəni onların bəstəkarı da Azərbaycanın muğamlarından danışır. İndi isə üzdəniraq qonşumuz deyir ki, bu, bizim musiqimizdir”.
Kənan Eynuroğlu
