Qubada istirahət mərkəzində yoxa çıxan 5 yaşlı uşaq tapılıb. İstiPress-in bölgə müxbirinin məlumatına görə, avqustun 28-də rayonun Əski İqrığ kəndinin ərazisindəki meşədə itən 2011-ci il təvəllüdlü Əliyev Natiq Namiq oğlu
itdiyi yerdən 4-5 km aralıda olan Möhüc meşəsindən tapılıb. Polis və sakinlər onu yatmış vəziyyətdə tapıblar. Uşaq Quba rayon Polis Şöbəsinə gətirilib. Azyaşlının vəziyyəti normaldır.
Xatırladaq ki, uşağın ailəsi kəndə yaxınlarından birinin xına mərasimində iştirak etmək üçün gedib. Lakin bir müddət sonra 5 yaşlı Natiq yoxa çıxıb. Onun axtarışı ilə FHN, polislə yanaşı, kənd sakinləri də məşğul olub.
Psixoloq-konsultant Arzu Müzəffərova isə "Şərq”ə açıqlamasında belə hadisələr sonrasında uşaqlarda ciddi travmaların yaşana biləcəyini istisna etməyib. Həmçinin də valideynləri üçün kifayət qədər gərgin situasiyadır:
"Uşaq yatmış vəziyyətdə tapılıb, ola bilər ki, qorxudan şok olub və beyin durub. İstənilən halda uşaq psixoloji müayinədən keçirilməlidir. Fəsadlar mütləq vardır. Dediyim kimi, gərgin anlarda beyin durur və insan şok vəziyyətində olur”.
Şəymən
