Hərbi Dəniz Qüvvələrinin Döyüş Gəmiləri Dəstəsi, Döyüş Təminatı və Təminedici Gəmilər Dəstəsi və Dəniz Piyadalarının iştirakı ilə keçirilən taktiki təlimlər davam edib.
“Report” xəbər verir ki, təlimlərin birinci mərhələsi üzrə növbəti tapşırıq icra olunub.
Beləliklə, təlimlərin gecə döyüşləri həyata keçirilib. Hava və sualtı hədəflərə qarşı atışların yerinə yetirilməsi tapşırığının icrası zamanı şərti düşmənin hava hədəfləri və sualtı qayıqlarına qarşı dərinlik bombaları tətbiq edilib. Eyni zamanda hava hücumuna qarşı istilik və radiolokasiya maneələrinin qoyulması tapşırığı yerinə yetirilib.
Bundan sonra plana uyğun olaraq müəyyən olunmuş hədəflərə atəş açılıb. Tapşırıq döyüş gəmiləri dəstəsi tərəfindən uğurla yerinə yetirilib.
Bununla da Hərbi Dəniz Qüvvələrinin taktiki təlimlərində birinci mərhələ üzrə bütün tapşırıqlar başa çatıb.
Qeyd edək ki, təlimlər iyunun 23-dək davam edəcək. Sabah təlimlərin ikinci mərhələsi üzrə tapşırıqlar icra olunacaq.
