Bu barədə "Sherg.az"a iqtisadçı-ekspert Vüqar Bayramov bildirib. Onun sözlərinə görə, məmurların,eləcə də deputatların maaşındakı artım orta aylıq əmək haqqıdakı artım tempindən kəskin fərqlənməməlidir:
" Bundan başqa dövlət qurumlarında maaşın normal olması vacib olsa da, belə yüksək əmək haqqı heç də hər zaman korrupsiyaya qarşı mübarizədə səmərəli vasitə deyil. Beynəlxalq Valyuta Fondu bir müddət öncə korrupsiya ilə əmək haqqı arasındakı asılılığı müəyyənləşdirmək üçün İndoneziya Maliyyə Nazirliyinin işçilərinin maaşlarını fondu vəsaiti hesabına 2 dəfə artırmışdı. 1 il sonra fond bu əmək haqqı artımının korrupsiyaya necə təsir etdiyini araşdıran zaman bəlli olmuşdur ki, həmin dövlət qurumunda rüşvətin həcmi də 2 dəfə artıb. Rüşvətin həcmi əmək haqqındakı artıma uyğunlaşdırılıb. Deməli, yüksək maaş heç də həmişə az korrupsiya anlamına gəlmir.
Bu isə o deməkdir ki, əmək haqqı artımları nəzarətin gücləndirilməsi ilə müşahidə edilməlidir ki, korrupsiyanın həcmi artmasın əksinə azalsın. Nəhayət, hər bir qurumda əmək haqqı səviyyəsi o qurumda xidmət səviyyəsinə uyğun olmalıdır. Əmək haqqı artımından öncə xidmətin keyfiyyətini yüksəltməyə ehtiyac var".
Qeyd edək ki, ötənlərdə Milli Məclisin plenar iclasında millət vəkili Qüdrət Həsənquliyev məmurların əmək haqlarının arıtırılması təklifi ilə çıxış edib. Deputat qeyd edib ki, məmurlar yüksək əmək haqqı alarsa, rüşvətə meyl göstərməz.
Ayyət Əhməd
