Ermənistanın xarici işlər nazirinin müavini Şavarş Köçəryan İrəvanın Azərbaycanın Avrasiya İqtisadi Birliyinə üzvlüyünün əleyhinə olmadığını, ancaq müəyyən şərtlərin olduğunu iddia edib.
Nazir müavini deyib ki, birincisi, Azərbaycan Ermənistanın blokadasına son qoymalı, ikincisi isə Ermənistana qarşı düşmən münasibətdən əl çəkməlidir. Məsələyə münasibət bildirən politoloq Elxan Şahinoğlu Köçəryanın açıqlamasına çox sərt reaksiya verib.
Ekspert bildirib ki, işğal davam edə-edə hansısa amorf təşkilatda üzvlük naminə Azərbaycanın Ermənistanın blokadasına son qoyacağını və Ermənistana qarşı düşmən mövqeyindən əl çəkəcəyini İrəvan ancaq yuxusunda görə bilər:
"Şərtə bax ha! Hələ siz soruşun ki, Azərbaycan Avrasiya İqtisadi Birliyinə üzv olmaq istəyir, ya yox? Qazaxıstan və Qırğızıstan Avrasiya İqtisadi Birliyinin üzvləridirlər. Buna baxmayaraq yola getmirlər, sərhədləri yarı işlək vəziyyətdədir. Görünür, İrəvanın qulağına çatıb ki, Rusiya Azərbaycanı Avrasiya İqtisadi Birliyinə dəvət edir, ancaq bu məsələdə Ermənistanın mövqeyi nəzərə alınmayıb. Əslində Şavarş Köçəryanın "şərtləri” Bakıdan çox Moskvaya ünvanlanıb ki, "bizim rəyimizi niyə nəzərə almırsınız?”. Yəni qul öz ağasına barmaq silkələyir.
Rusiyanın xarici işlər naziri Sergey Lavrov Bakıda mətbuat konfransında "Azərbaycanın Avrasiya İqtisadi Birliyinə üzvlüyünə şad olardıq” fikrini dilə gətirdi. Ancaq bu zaman Lavrov üzvlük üçün Azərbaycan qarşısında hansısa şərti söyləmədi. Köçəryan və onun naziri iradını Lavrov bölgəni tərk etdikdən sonra bildirib”.
İsmayıl
