Bu ildən etibarən ümumi təhsil məktəblərində birinci sinfə şagird qəbulu zamanı valideynlərdən elektrik enerjisi qəbzinin kodu tələb olunur. Tətbiq edilən bu yenilik təkcə Bakı şəhərini əhatə edir. Artıq şagird qəbulunun başlamasına sayılı günlər qalmasına baxmayaraq, bir çox valideyn bu yenilikdən xəbərdar deyil və bunun hansı məqsədlə tətbiq edildiyini də bilmir.
Təhsil ekspertləri isə tətbiq edilən yeniliyin məktəblərdəki sıxlığın aradan qaldırılmasına hesablandığını qeyd edib.
Təhsil eksperti Nabatəli Qulamoğlu isə "Şərq”ə açıqlamasında birinci sinfə şagird qəbulu zamanı valideynlərdən elektrik enerjisi qəbzinin kodunun tələb olunmasını absurd yanaşma kimi dəyərləndirib və heç bir effekt verməyəcəyini əlavə edib:
"Məktəblərdə yaşanan şagird sıxlığının başlıca səbəbi bölgələrdə yaşayan əhalinin Bakıya axın etməsi ilə bağlıdır. Şagird sıxlığını aradan qaldırmağın başlıca yolu bu problemin həllindən keçir. Yox əgər bunun qarşısını almaq mümkün deyilsə, o zaman məktəblərin sayını artırmaq lazımdır. Əgər hansısa valideyn övladını evinin yaxınlığında, yaşadığı ərazidə yerləşən məktəbə yox, nisbətən uzaqda olan daha perspektivli məktəbə qoymaq istəyəcəksə, bunun yolunu tapacaq.
Ya məktəb direktoru, da ya işıq idarəsinin əməkdaşları ilə razılaşıb adına qəbz alacaq. İkincisi də işıq pulu qəbzi ilə məktəbə qəbulun heç bir məntiqi izahı yoxdur. Sıxlığı yaradan səbəbləri araşdırmaq, problemi aradan qaldırmaq lazımdır. Heç bir valideyn istəməz ki, uşağı evinə uzaq məktəbə getsin. Əgər uşaq yaxınlıqdakı məktəbdən lazımi bilik alarsa, valideynin nə marağı var ki, əlavə əziyyət, ya xərc çəkib onu uzağa göndərsin?”.
N.Qulamoğlunun fikrincə, sıxlığı aradan qaldırmaq üçün alternativ variantlar düşünmək lazımdır. Onun sözlərinə görə, birinci sinfə şagird qəbulu zamanı valideynlərdən elektrik enerjisi qəbzinin tələbi çox ciddi ajiotaja səbəb olacaq:
"Bakıda kirayə qalan minlərlə ailə var. Bəs onların uşaqlarını hansı meyarlarla qəbul edəcəklər. Necə sübut edəcəklər ki, bu uşaq həmin məktəbin yaxınlığında yaşayır, yoxsa başqa bir ərazidə? Kirayəşinlərin adına nə işıq, nə də su qəbzi olur. Küçələrə düşüb, həmin adamın doğrudan da göstərilən ərazidə kirayə qalıb-qalmadığını araşdıracaqlar? Düşünürəm ki, tətbiq edilən yeniliklə özləri-özlərini dolaşığa salırlar. Nə etdikləri, nə də etmək istədikləri bəllidir”.
Şəymən
