"Kriptovalyutalarda baş verən bu qiymət ucuzlaşması normal haldır”
Bu barədə "Sherg.az”a kriptovalyutaların kəskin ucuzlaşmasından danışarkən iqtisadçı-ekspert Pərviz Heydərov bildirib.
Onun sözlərinə görə, kriptovalyutalar hələ özünü sabitlik cəhətdən doğrultmayan bir ödəniş vasitəsidir:
"Kriptovalyutaların qiyməti tez-tez dəyişir. Bəzən görürsən ki, maksimim həddə qalıxıb, bəzən də bu şəkildə enib. Artıq bu qeyri-sabitlik kriptovalyutalarda adi hala çevrilib. Onun müvafiq dəyər itirməsində də qeyri-adi heç nə yoxdur. Çünki bir müddət əvvəl kriptovalyutaların dəyəri yüksəldi. Xüsusən də bitkoinlər bu sahədə daha aktivdir. Hələ onda biz ekspertlər qeyd etmişdik ki, onun dəyərinin artması tendensiyası sübut edirdi ki, bu, hardasa özünü doğrultmamış bir yenilikdir. Onun gələcəkdə maliyyə bazarlarının özündə kök atması, genişlənməsi hələ qarşıdakı illər ərzində gözlənilirdi. Ona görə də, qeyd etdiyim o qiymət ucuzlaşması prosesi təbii bir tendensiyadır. Bu, yuxarıda dediklərimin dolayısı ilə təsdiqidir”.
Qeyd edək ki, dünyanın ən populyar kriptovalyutası olan bitkoinin qiyməti son bir neçə gün ərzində müxtəlif istiqamətlərdə dəyişib. Bitkoin 7,6 min dollara alınıb satılır. Mütəxəssislər yaxın zamanlarda kriptovalyutanın qiymətinin kəskin düşə biləcəyini deyir. Belə ki, "CoinMarketCap" portalının məlumatlarına əsasən, bitkoinin qiyməti 1,08% ucuzlaşaraq 7,615 dollar təşkil edib. Alternativ kriptovalyutaların qiymətində artım qeydə alınıb. Belə ki, "Ethereum" 0,83% və ya 608,97 dollaradək, "Ripple" 2,95% (0,672 dollara qədər) , "Bitcoin Cash" 3,74% (1,15 min dollaradək) bahalaşıb. Kriptovalyuta bazarının kapitallaşması hazırda 345,16 milyard dollar təşkil edir və bunun 38 faizi bitkoinin payına düşür.
Kənan Eynuroğlu
