"Manat öz səviyyəsində deyil, süni inzibati tədbirlərlə, bazar münasibətlərinə xas olmayan alətlərdən istifadə edilərək saxlanılır”.
Bunu "Sherg.az”a bu ilin sonunda dollara tələbatın artacağı və bu xarici valyutanın bahalaşacağı iddialarına münasibət bildirərkən iqtisadçı-ekspert Fuad İbrahimov deyib.
O bildirib ki, manata təsir edəcək məqam ilk növbədə Federal Ehtiyatlar Sisteminin (FED) qərarı olacaq:
"Lakin FED uçot dərəcəsini artırsa da, artırmasa da dollara yaranacaq tələbat idxal-ixrac əməliyyatlarına təsir edəcək. İdxal həqiqətən tələbata uyğun artacaqsa, manatı indiki vəziyyətdə saxlamaq çətin olacaq. Bütün iqtisadçı həmkarlarımla razıyam. Nəinki ilin sonuna, hətta indiki vəziyyətdə də manat təzyiq altındadır. Konkret məkan və zaman çərçivəsində bunu gizləməyə əlacımız qalıb. FED uçot dərəcəsini artırsa, ikiqat təzyiq olacaq. Tam əminliklə demək olar ki, o zaman manatın məzənnəsini sabit saxlamaq olmayacaq”.
Qeyd edək ki, iqtisadçı- ekspert Vüqar Bayramov da dekabr ayında dollara tələbatın artacağını təsdiqləyib. Onun sözlərinə görə, bunun manatın məzənnəsinə necə təsir göstərəcəyi birbaşa Mərkəzi Bankdan asılı olacaq. İqtisadçı bildirib ki, Mərkəzi Bank indidən dekabr ayında artan tələbə hazır olmalıdır.
Aysel Aslan
