Gürcüstanın "Gürcü arzusu” partiyası bələdiyyə seçkiləri ilə bağlı namizədlərin siyahısına dəyişiklik edib. Hakim partiya Marneuli meri vəzifəsinə yeni namizəd irəli sürüb. Əvvəlki namizəd Amiran Giorqadzenin adı siyahıdan çıxarılıb, onun yerinə Tbilisidə anadan olmuş, Gürcüstanın Azərbaycandakı səfirliyində çalışmış Temuri Abbazovinin namizədliyi irəli sürülüb.
Hakim partiyadan bildiriblər ki, ilk siyahı tərtib olunarkən bəzi amillər nəzərə alınmayıb. Lakin müzakirələrdən sonra azərbaycanlıların yığcam yaşadıqları bölgələrdən yerli namizədin irəli sürülməsi barədə qərar qəbul olunub. Hakim partiyanın siyahısında digər dəyişikliklərin də olunacağı istisna olunmur. Gürcüstanda yerli idarəetmə orqanlarına seçkilər oktyabrın 21-də keçiriləcək.
Merneuli İcra Hakimiyyətinə azərbaycanlı namizədin irəli sürülməsinə münasibət bildirən soydaşımız, "Qeyrət” Xalq Hərəkatının sədri Əlibala Əsgərov "Şərq”ə deyib ki, hakim partiya rəsmi təqdimatını sentyabr ayının axırında edəcək. QHT rəhbəri bildirib ki, Amiran Giorqadze partiyanın rayon təşkilatı tərəfindən irəli sürülmüşdü. Yəni mərkəzi partiya bu vaxta qədər susqunluğunu qoruyurmuş:
"Əslində regionda tamamilə yeni bir namizədin - Temuri Abbazovinin namizədliyi gözlənilmirdi. Çünki bu şəxsi bölgədə yaxşı tanımırlar. Ona görə də namizədliyi rəğbətlə qarşılanmadı. Çox istərdik ki, regionu bilən, tanıyan, ərazinin spesifik problemlərinə bələd olan bir şəxs namizəd olsun. Amma nə etmək olar? Hər halda gəncdir, yəqin hakim partiyanın bildiyi hansısa məsələlər var. Respublika müstəqillik qazanandan bugünə kimi rayon "sakrebulo”suna, yəni bələdiyyəsinə hər zaman azərbaycanlı seçilmişdi. Görünən odur ki, rayonun yeni bələdiyyəsi də azərbaycanlıların əlindən alınır. Əvəzində regionla heç bir əlaqəsi olmayan bir nəfərin namizədliyi Marneuli rayon meri kimi irəli sürülür, mən bu prosesə nailiyyət kimi baxmıram”.
İsmayıl
